विराटनगर । प्रदेश नामकरणप्रति असन्तुष्टि जनाएर आन्दोलनमा रहेका पहिचानवादी संगठनहरुले प्रतिनिधिसभा सदस्यका लागि इलाम क्षेत्र नम्बर २ मा हुन लागेको निर्वाचनमा साझा उम्मेद्वार उठाउने भएका छन् ।
‘कोशी’ नाम खारेजीका लागि आन्दोलनको अगुवाइ गर्न गठित प्रदेश नम्बर १ पुनः नामाङ्कन संयुक्त सङ्घर्ष समितिले इलाममा हुने उपनिर्वाचनमा साझा उम्मेदवार उठाउने भएको हो ।
संविधानसभाका तत्कालीन अध्यक्ष सुवास नेम्वाङको निधन भएपछि इलाम क्षेत्र नम्बर २ बाट प्रतिनिधिसभा सदस्य पद खाली छ ।
सुनसरीको धरानमा भएको समितिको बैठकले उक्त क्षेत्रमा साझा उम्मेदवार उठाउने निर्णय गरेको हो ।
बैठकले अन्य विभिन्न विषयमा पनि निर्णय गरेको छ । संघर्ष समितिले प्रदेशको नाम ‘कोशी’ नाम राखिएको फागुन १७ गतेलाई कालो दिन मनाउने निर्णय गर्दै सो दिन आमहड्ताल गर्ने निर्णय गरेको जनाइएको छ ।
प्रदेश सभा, सरकार र प्रदेश सभाका सांसद र दलका नेताहरू जिम्मेवार भएर पुनः नामाङ्कनको प्रक्रिया अघि नबढाए आमहड्ताललाई अनिश्चितकालीन रूपमा लम्ब्याउने चेतावनी संघर्ष समितिले दिएको छ ।
पहिचानको आन्दोलन जनसमुदायिकरण, राष्ट्रिय, अन्तर्राष्ट्रियकरण भएको र कसैले हार्नु नपर्ने, पुनः नामकरण भए आम जनताको जित हुने बुझेर आन्दोलन अझ सशक्त बन्दै गएको बैठकमा भएको समीक्षाले निष्कर्ष निकालेको किरात याक्थुङ चुम्लुङ केन्द्रीय अध्यक्ष प्रेम एक्तेनले बताए ।
बैठकमा नेपाल आदिवासी जनजाति महासङ्घका केन्द्रीय अध्यक्ष ग्याल्जे शेर्पा, पुनः नामाङ्कन अभियान समिति अध्यक्ष डकेन्द्रसिंह थेगिम, किरात राई यायोक्खाका केन्द्रीय अध्यक्ष जीवन हाताची राई र नेपाल शेर्पा सङ्घका महासचिव लाक्पा शेर्पा, पूर्वसंस्कृति मन्त्री गोपाल किराती, जनमुक्ति पार्टी अध्यक्ष केपी पालुङगालगयतको सहभागिता थियो ।
प्रतिक्रिया