काठमाडौं । देशभर जारी अविरल वर्षासँगै आएको बाढी र पहिरोका कारण विभिन्न प्रदेशका प्रमुख राजमार्ग तथा सडकखण्डहरू प्रभावित भएका छन् ।
नेपाल प्रहरीले सार्वजनिक गरेको विवरणअनुसार विभिन्न स्थानमा पहिरो खस्दा सडक पूर्ण रूपमा अवरुद्ध भएका छन् भने केही सडकखण्डमा जोखिमलाई मध्यनजर गर्दै रात्रिकालीन सवारी आवागमनमा समेत रोक लगाइएको छ ।
कान्तिलोकपथ सडकखण्ड स्थित बागमती गाउँपालिका वडा—३ टाकुर्चेमा यही ११ गते बिहान ३ः४० बजे गएको पहिरोका कारण सडक पूर्णरूपमा अवरुद्ध भएको छ ।
टिकाभैरव–चारघरे सडकखण्ड स्थित गोदावरी नगरपालिका वडा—४ स्थित सडकमा १२ गते दिउँसो १४ः१० बजे पहिरो खस्दा आवतजावत पूर्णरूपमा अवरुद्ध रहेको छ ।
सोलुखुम्बु जिल्लाभित्र पर्ने सिद्धिचरण लोकमार्ग लगायत अन्य भित्री सडकहरूमा बाढी–पहिरोको सम्भावित जोखिमलाई ध्यानमा राख्दै रोक लगाइएको छ । असोज ८ देखि १२ गतेसम्म भारी वर्षाको पूर्वानुमान रहेकाले बेलुकी ६ देखि बिहान ६ बजेसम्मका लागि अत्यावश्यक बाहेकका सम्पूर्ण सवारी साधन तथा पैदल यात्रुहरूको रात्रिकालीन आवतजावतमा पूर्ण रोक लगाइएको छ ।
पृथ्वी राजमार्ग अन्र्तगत धादिङ खण्ड सम्भावित बाढी तथा पहिरोको उच्च जोखिमलाई मध्यनजर गर्दै असोज ९ गते बिहान ७ बजेदेखि अर्को सूचना प्रकाशित नभएसम्मका लागि धादिङ जिल्ला र आसपासका क्षेत्र भई सञ्चालन हुने सम्पूर्ण सवारी साधनको आवागमनमा पूर्ण रोक लगाइएको छ ।
पृथ्वी राजमार्ग अन्र्तगतको कृष्णभिर, वडा—३ गौमतीखोला तथा गजुरी गाउँपालिका वडा—२ चालिसे र परेवाभिरमा खसेको पहिरोपछि हाल सडक एकतर्फी सुचारु गरिएको छ ।
काभ्रेको रोशी गाउँपालिका—८ गिम्तिबेशी र वडा नम्बर चारसय बेशी क्षेत्रमा पहिरो खसे पनि बीपी राजमार्ग हाल एकतर्फी रूपमा सुचारु गरिएको छ ।
प्रतिक्रिया