समाजवादी मोर्चाको नेतृत्व हरेक ४ महिनामा फेर्ने सहमति

काठमाडौं । समाजवादी मोर्चाको नेतृत्व चार महिनामा परिवर्तन हुने भएको छ ।

शनिबार बसेको मोर्चाको बैठकले चार महिनामा नेतृत्व परिवर्तन गर्ने निर्णय गरेको हो । असार ३ मा समाजवादी मोर्चा गठनको घोषणा भएको थियो । त्यसबेलामा मोर्चाको नेतृत्व आलोपालो गर्ने समझदारी बनेपनि कति समय नेतृत्व गर्ने भन्ने टुंगो लागेको थिएन ।

सुरुमा ६ महिनामा नेतृत्व आलोपालो गर्ने विषयमा छलफल भएपनि अहिले आएर चार महिनामा नेतृत्व आलोपालो गर्ने गरि टुंग्गो लागेको हो ।

मोर्चाको बैठकले जिल्ला तहसम्म संरचना बनाउने निर्णय पनि गरेको छ । त्यस्तै साउन १२ गतेपछि सातै प्रदेशमा मोर्चाको आवश्यकता र औचित्य बुझाउने गरी भेला गर्ने निर्णय गरेको छ ।