काठमाडौं । नेकपा माओवादी केन्द्रले प्रमुख प्रतिपक्ष दलको हैसियतले संसदमा सशक्त रुपमा प्रस्तुत हुने निर्णय गरेको छ ।
बिहीबार सिंहदरबारमा बसेको माओवादीको संसदीय दलको बैठकले विपक्षी सात दलसँग बिहानको बैठकमा भएको ५ बुँदे सहमतिका अनुसार संसदमा प्रस्तुत हुने निर्णय गरेको प्रमुख सचेतक हितराज पाण्डेले जानकारी दिए ।
उनले भने, ‘संघीय संसदको हिउदे अधिवेशन जसलाई विधेयक अधिवेशन पनि भनिन्छ यसलाई व्यवस्थित, थप प्रभावकारी कसरी बनाउने र हाम्रो दल प्रमुख प्रतिपक्षीदलको रुपमा रहेका जिम्मेवारीहरु छन्, एउटा आफ्नो दलको तर्फबाट सशक्त रुपमा जनताका आवाजहरु सदनमा उठाउने र अन्य विपक्षी दलहरुलाई पनि लिएर हाम्रा मध्य एकता हुनसक्ने विषयवस्तुमा सामुहिक रुपमा आवाज बुलन्द गर्ने यी जिम्मेवारीलाई व्यवस्थित गर्नको लागी बैठक सम्पन्न भएको छ ।’
सरकारले ल्याएको अध्यादेश लोकतन्त्रलाई सवलीकरण गर्नेगरी नआएको बैठकले निष्कर्ष निकालेको पनि उनले जानकारी दिए ।
प्रतिक्रिया