मुलुकसँग भएका सन्धि, सम्झौता सार्वजनिक गर : पूर्ण बस्नेत

काठमाडौं । जनता समाजवादी पार्टी (जसपा) नेपालका प्रचार प्रसार तथा प्रकाशन विभाग प्रमुख पूर्ण बस्नेतले नेपाल सरकारले आजसम्म गरेका सन्धि, सम्झौताको अवस्थाबारे जनतालाई जानकारी गराउन माग गरेका छन् ।

प्रधानमन्त्री केपी शर्मा ओलीको आसन्न चीन भ्रमणका दौरान विआरआइ कार्यान्वयन सम्झौता हुनसक्ने चर्चाका माझ प्रमुख बस्नेतले कतिपय सन्धि, सम्झौताहरु पुनरावलोकन गर्नुपर्ने र कतिपय खारेज गर्नुपर्ने अवस्थामा रहेको भन्दै आजसम्म गरिएका सम्पूर्ण सन्धि सम्झौताबारे समीक्षा गरेपछि मात्र मुलुकले थप कस्ता खाले सन्धि, सम्झौताहरु गर्नुपर्ने र के कस्ता सन्धि, सम्झौता गर्न नपर्ने भन्ने कुरा थाहा हुने बताएका हुन् ।

‘देशको कायापलट हुने भनेर गरिएका सन्धि, सम्झौता पनि थिए । आजसम्म भएका सन्धि र सम्झौताले देशको विकास र समृद्धि, सार्वभौमसत्ताको रक्षा, राष्ट्रिय एकताको जगेर्ना गर्न कति सहयोग पुर्यायो त्यसबारे जनतालाई स्पष्ट पार्नुपर्ने बस्नेतले बताए । कसको पालामा कुन कुन विषयमा के कति सन्धि, सम्झौताहरु भएका छन् ती सबै सार्वजनिक गरियोस्,’ बस्नेतले भने ।

इमान्दारीपूर्वक भन्ने हो भने यो मुलुकमा सबैभन्दा खतरा कोहीसँग छ भने त्यो नेपाल सरकारसँग छ । सरकारले एकातिर आफ्नै मुलुकमा महङ्गी, भ्रष्टाचार र लुटको आतंक मच्चाउने गरेको छ । अर्कातिर अनेकौं सन्धि, सम्झौताका नाममा अन्य मुलुकहरुसँग प्राप्त गरेको ऋण, अनुदान र सहयोगलाई पनि कमिसन, भ्रष्टाचार, महङ्गी र लुटमा रुपान्तरण गर्ने काम गर्दछ, बस्नेतको आरोप छ । 

उनले भने, जनता सरकारसँग सतर्क रहनुपर्दछ । । सरकारलाई एकदमै नजिकबाट निगरानी र खबरदारी गरिराख्ने र एकदमै खराब अवस्थामा रहेको देशको राजनीतिबाट देश र जनताले यथाशक्य निकास पाउन अवस्था सिर्जना गर्नुपर्दछ ।