क्रसर तथा खानी उद्योग व्यवसायीहरुको पक्षमा नेकपा एस

काठमाडौं । आइतबारदेखि सडक आन्दोलनमा रहेका नेपाल क्रसर तथा खानी उद्योग व्यवसायीहरुका मागप्रति नेकपा (एकीकृत समाजवादी)ले ऐक्यवद्धता जनाएका छन् । विहीबार नेकपा एसका प्रमुख सचेतक मेटमणि चौधरी आन्दोलन स्थल माइतीघर मण्डलामै पुगेर गएर ऐक्यवद्धता जाहेर गरेका हुन्

‘स्वतन्त्रपूर्वक व्यवसाय गर्न पाउ भन्ने मागसहित सडकमा उत्रिनु भएका सबै व्यवसायीहरुको मागप्रति म र आवद्ध राजनीतिक दल नेपाल कम्युनिष्ट पार्टी एकिकृत समाजवादीको तर्फबाट ऐक्यवद्धता जाहेर गर्न चाहन्छु । यसको साथै सधैँ साथ रहने प्रतिबद्धता पनि राख्न चाहान्छु ।’

उनले सरकार राजस्वको दायरा बढाउने भन्दा पनि आफ्नो कुर्सी जोगाउने र बचाउने खेलमा लागेको कारण उद्योगी, पेशा, व्यवसायीहरु धेरैका मागहरु अलपत्र रहेको बताए । उनले भने, ‘मैले के गर्नुपर्ने हो, हामीले के गर्नुपर्ने हो । नेपालमा पुँजीपतिहरुको संख्यामा कसरी वृद्धि गर्ने, राजस्वको दायरा कसरी बढाउने भन्दा पनि आफ्नो कुर्सी कसरी जोगाउने, बचाउने खेलमा मात्र सरकार रहेको छ । जसका कारण उद्योगी व्यवसायीहरु धेरैका मागहरु अलपत्र अवस्थामा छन् ।’

क्रसर तथा खानी उद्योग सम्बन्धी कानून पनि बन्दै गरेको भन्दै उनले सम्भवत यही महिनाभित्र कानूनको टुंगो लाग्ने आश्वासन दिए । सरकारले क्रसर उद्योगका नवीकरण नगरेको र मुद्दाहरु सम्बोधन नगरेको भन्दै व्यवसायीहरु आन्दोलित भएका हुन् ।

व्यवसायीहरुको माग सम्बोधन नभए नीजि क्षेत्र, नागरिक एवम पीडितहरु सडकमार्फत आन्दोलन चर्काउने भन्दै आन्दोलनबाट हुने क्षतीको जिम्मेवारी सरकारले लिनुपर्ने बताउँदै आइरहेका छन् ।