काठमाडौं । नेपाली कम्युनिस्ट पार्टीका सांसद गोपाल शर्माले बुधबार बसेको प्रतिनिधि सभा बैठकमा सरकार संसदप्रति उत्तरदायी नभएको आरोप लगाएका छन् ।
उनले संविधानको धारा ७६(१०) ले सरकारलाई संसदप्रति उत्तरदायी र जवाफदेही हुने स्पष्ट व्यवस्था गरेको उल्लेख गर्दै उक्त संवैधानिक व्यवस्थाको पालना सरकारले नगरेको दाबी गरे ।
‘हाम्रो संविधानको धारा ७६(१०) ले सरकारलाई संसदप्रति उत्तरदायित्व उल्लेख गरेको छ । संविधानप्रति उत्तरदायी हुने र जवाफदेही हुने सरकारको कर्तव्यलाई पालना गर्नुको सट्टा सरकारले संसदको हुर्मत लिने गरी काम गरिरहेको छ,’ उनले भने ।
सांसद शर्माले सरकारका गतिविधिका विषयमा आफूहरूले पटक–पटक संसदमा प्रश्न उठाउँदै आएको पनि बताए । उनले पछिल्लो सन्दर्भमा प्रधानमन्त्रीले संसदको रोष्ट्रम प्रयोग गरेर देशको सीमाबारे दिएको अभिव्यक्ति गलत भएको उल्लेख गर्दै त्यसलाई सच्याउनुपर्ने आवश्यकता रहेको बताए ।
‘यस सन्दर्भमा हामीले पटक पटक संसदमा कुरा उठाएका छौं । पछिल्लो सन्दर्भमा संसदको रोष्ट्रम प्रयोग गरेर प्रधानमन्त्रीले देशको सिमाबारे दिएको गलत अभिव्यक्ति सच्याउन आवश्यक छ,’ उनले भने ।
उनले सभामुखले उक्त विषयमा रुलिङ नगरेको र सरकार पनि संसदमा आएर स्पष्ट जवाफ दिन नआएको भन्दै आपत्ति जनाए । ‘न सभामुखले रुलिङ गर्नुहुन्छ, न सरकार जवाफदेही भएर संसदमा आएर जवाफ दिन्छ,’ उनले भने ।
प्रतिक्रिया