काठमाडौं । सशस्त्र प्रहरी बलको एपीएफ फुटबल क्लबले राष्ट्रिय लिगअन्तर्गत बिहीबार शीर्ष डिभिजन क्लब चर्च ब्वाइज युनाइटेडलाई ४–१ गोलअन्तरले पराजित गरेको छ। च्यासलस्थित च्यासल रंगशालामा भएको खेलमा एपीएफले दोस्रो लगातार जित दर्ता गर्दै प्रतियोगिताको तेस्रो स्थानमा उक्लिएको छ।
एपीएफको जितमा युवराज खड्काले दुई गोल गरे भने समिराज ठोकर र प्रदीप लामाले एक–एक गोल गरे। चर्च ब्वाइजका लागि मिलन राईले सान्त्वना गोल गरे।
खेलको २२औँ मिनेटमा समिराज ठोकरले गोल गर्दै एपीएफलाई अग्रता दिलाए। ३८औँ मिनेटमा प्रदीप लामाले गोल गर्दै स्कोर २–० बनाए। दोस्रो हाफको ६०औँ मिनेटमा युवराज खड्काले गोल गर्दै अग्रतालाई ३–० पुर्याए। उनले ७७औँ मिनेटमा पुनः गोल गर्दै टोलीको चौथो गोल गरे।
८२औँ मिनेटमा चर्च ब्वाइजका मिलन राईले एक गोल फर्काए पनि टोलीको हार टार्न सकेनन्।
यो जितसँगै एपीएफले दुई खेलबाट ६ अंक जोड्दै अंक तालिकाको तेस्रो स्थानमा उक्लिएको छ। चर्च ब्वाइज भने दुई खेलबाट मात्र एक अंकसहित अंक तालिकाको तल्लो स्थानमा रहेको छ।
प्रतिक्रिया