काठमाडौं — नेकपा (एमाले) का अध्यक्ष केपी शर्मा ओलीले निर्वाचित जनप्रतिनिधिलाई हटाएर अनिर्वाचित व्यक्तिलाई सिंहदरबारमा राख्ने प्रयास लोकतान्त्रिक मूल्य–मान्यताको विपरीत हुने भन्दै आपत्ति जनाएका छन्।
पार्टीको ११औँ महाधिवेशनको लोगो सार्वजनिक गर्न आइतबार (मंसिर १४) च्यासलमा आयोजित कार्यक्रममा बोल्दै उनले सिंहदरबार जनप्रतिनिधिबाट सञ्चालित सरकारको केन्द्र भएको उल्लेख गरे।
“निर्वाचित जनप्रतिनिधिलाई लखेटिनुपर्ने र अनिर्वाचितहरू राखिनुपर्ने अवस्था लोकतन्त्रविरुद्ध हुन्छ,” उनले भने।
ओलीले एमाले र आफूविरुद्धको असन्तुष्टि संसद् र विकास प्रक्रियामा पोख्न नहुने समेत बताएका छन्। उनले संसदीय प्रणाली, लोकतन्त्र र संविधानको रक्षा आवश्यक रहेको धारणा राखे।
कार्यक्रममा एमालेका शीर्ष नेताहरू तथा कार्यकर्ता सहभागी थिए।
प्रतिक्रिया