काठमाडौँ — नेपाली कांग्रेसको संस्थापन पक्षका २५ केन्द्रीय सदस्यले पार्टीको नियमित महाधिवेशन प्रक्रिया तत्काल सुरु गर्न कार्यवाहक सभापति पूर्णबहादुर खड्कालाई ध्यानाकर्षणपत्र बुझाउने तयारी गरेका छन् ।
देउवा समूहसँग नजिक रहेका यी सदस्यहरूले आन्तरिक विवाद बढ्न नदिन र पार्टीलाई संस्थागत प्रक्रियामा लैजान महाधिवेशन आवश्यक भएको बताएका छन्। ध्यानाकर्षणपत्र बुझाउन लाग्ने समूहमा पहिले खुमबहादुर खड्कासँग नजिक भएर काम गरेका तथा हाल पूर्णबहादुर खड्कासँग जोडिएका केन्द्रीय सदस्यहरू छन्। उनीहरूमध्ये रमेश रिजाल र उदयशमशेर राणा जस्ता देउवाका निकट नेता पनि समावेश छन्।
नेताहरूले नियमित महाधिवेशन प्रक्रिया अघि बढेपछि विशेष महाधिवेशनको विवाद स्वतः अन्त्य हुने दाबी गरेका छन्। केन्द्रीय सदस्य देवेन्द्रराज कँडेलले पार्टीलाई फुटबाट जोगाउन नेतृत्वले तत्काल कदम चाल्नुपर्ने बताए।
“हामी २५ जनाले केही बेरमै कार्यवाहक सभापतिलाई ध्यानाकर्षण गराउँदैछौँ,” कँडेलले भने, “पार्टीलाई झगडाबाट टाढा राख्दै महाधिवेशनमार्फत मार्गनिर्देशन गर्नुपर्छ।”
समूहका अनुसार उनीहरूको उद्देश्य कुनै गुटको पक्षपोषण नभई महाधिवेशनमार्फत पार्टीलाई सुदृढ बनाउनु हो।
प्रतिक्रिया