काठमाडौं । भारत र पाकिस्तानबीच बढ्दो तनावका कारण नेपाल आउने र यहाँबाट प्रस्थान गर्ने अन्तर्राष्ट्रिय उडानको समय लम्बिएको छ। विशेषतः युरोप र मध्यपूर्वतर्फका उडानहरू सामान्यभन्दा एक घण्टासम्म ढिलो भइरहेको त्रिभुवन अन्तर्राष्ट्रिय विमानस्थलले जनाएको छ।
विमानस्थलका महाप्रबन्धक प्रेमनाथ निरौलाका अनुसार, पाकिस्तानको आकाश प्रयोग गर्न नपाएकाले अन्तर्राष्ट्रिय विमानहरूले वैकल्पिक हवाई मार्ग अपनाउनु परेको छ। “पहिले विमानहरू पाकिस्तान, अफगानिस्तान र इरान हुँदै छोटो रुटबाट नेपाल आउँथे,” उनले भने, “तर अहिले दुबई, ओमान हुँदै मुम्बईमार्गबाट घुमाएर ल्याइँदैछ, जसले उडान समय लम्बिएको हो।”
हाल युरोप र खाडी मुलुकहरूबाट आउने करिब १५ वटा नियमित उडानहरू प्रभावित भएका छन्। यसले कतार एयरवेज, फ्लाई दुबई, जजिरा, कुवेत एयरवेज, एयर अरेबियालगायतका एयरलाइन्सलाई असर पारेको छ।
नेपालबाट प्रस्थान गर्ने उडानहरू सिमरा, लखनऊ हुँदै मुम्बईको हवाई मार्ग प्रयोग गरिरहेको विमानस्थल स्रोतले जनाएको छ। यद्यपि, हालसम्म हवाई भाडादरमा कुनै उल्लेखनीय परिवर्तन आएको छैन।
विशेषज्ञहरूका अनुसार यदि भारत–पाकिस्तानबीचको तनाव अझै बढ्दै गयो भने हवाई यातायात र भाडामा थप असर पर्न सक्ने सम्भावना रहेको छ।
यसरी, राजनीतिक तनावको छायाँले अन्तर्राष्ट्रिय हवाई उडानहरूमा असर पार्न थालेको देखिएको छ।
प्रतिक्रिया