कीर्तिपुरमा उत्साहपूर्वक मतदान, उम्मेदवारहरुको आ–आफ्नै दाबी

काठमाडौं । कीर्तिपुर नगरपालिकाका २० स्थानमा नगरप्रमुख र दुई वडाध्यक्षका लागि उत्साहपूर्वक मतदान जारी छ ।

मतदान जारी रहँदै गर्दा कीर्तिपुर नगरपालिकाका मेयर पदका उम्मेदवार कृष्णमान डंगोलले कीर्तिपुर जनताको अपार  मायाले जित्ने दावी गरेका छन् । उनले आफ्नो  इमान्दारिता नै देखेर कीर्तिपुरबासीहरुले  आफूलाई भोट  गरेर जिताउने दावी गरेका हुन् ।

उनले भने, ‘जित्ने आधार मेरो लागि कीर्तिपुर जनताको अपार माया हो । मेरो  इमान्दारिता देखेर र जनतामाझ मैंले गरेको समाजसेवा नै मेरो जित्ने आधार  हो । सानो बेलादेखि हेर्दै आएको कीर्तिपुरबासीहरुको समस्या विस्तारै पूरा हुँदैछ । कीर्तिपुर जनताको लागि विकासहरुको आवश्यक्ता छ त्यो  विस्तारै पूरा हुनेछ  । म समाज सेवा र विकास गर्दै जानेछ ।’ साथै उनले सहजतापूर्ण रुपले मतदान भइरहेको समेत बताए । 

नगरप्रमुख र वडा नं १ र ४ का वडाध्यक्षका लागि जारी मतदानमा नगरप्रमुखमा दलीय र स्वतन्त्र गरी २० उम्मेदवार तथा वडा नं १ मा नौ र वडा नं ४ मा १२ जना उम्मेदवार प्रतिस्पर्धामा छन् ।

नगरप्रमुख राजकुमार नकर्मी, वडा १ का अध्यक्ष हीरालाल महर्जन र वडा नं ४ का अध्यक्ष श्यामराज अधिकारीको निधनपछि उक्त पद रिक्त भएका हुन् ।