रक्षामन्त्रीबाट राजीनामा दिने मिनेन्द्र रिजालको घोषणा

काठमाडौं । रक्षामन्त्री तथा नेपाली कांग्रेसको जारी १४औँ महाधिवेशन अन्तर्गत महामन्त्री पदका उम्मेदवार मिनेन्द्र रिजालले रक्षामन्त्री पदबाट राजीनामा दिने घोषणा गरेका छन् ।

महामन्त्रीका लागि भएको मतदानको मतगणना जारी रहँदा नै उनले राजीनामाको घोषणा गरेका हुन् । उनले प्रारम्भिक मत परिणामबाट नै स्पष्ट रुपमा अन्तिम नतिजाको आँकलन गर्दै सामाजिक सञ्जालमा लेख्दै राजीनामाको घोषणा गरेको बताएका छन् ।

जारी मतगणनामा रिजाल ६ जना प्रतिस्पर्धीमध्ये पाँचौ नम्बरमा परिरहेका छन् । पहिलो र दोस्रो स्थानमा गगन थापा र विश्वप्रकाश शर्मा रहेका छन् ।

उनले लेखेका छन्,’नेपाली काङ्ग्रेसको चौधौं महाधिवेशनमा मैले प्रतिस्पर्धा गरेको महामन्त्री पदको प्रारम्भिक परिणामबाट नै स्पष्टरूपमा प्राप्त सन्देशलाई दृष्टिगत गर्दै रक्षामन्त्रीको पदबाट राजीनामा दिने निर्णय लिएको छु। अन्तिम परिणाम प्राप्त हुनासाथ सम्माननीय प्रधानमन्त्रीसमक्ष राजीनामा पेश गर्नेछु’।