राष्ट्रपति उम्मेदवार टुंग्याउन चार दलको बैठक अपरान्ह ५ बजे फेरि बस्ने

काठमाडौं । चुनावअघिको सत्ता गठबन्धनमा रहेका चार दलले आज अपरान्ह ५ बजे फेरि बैठक गर्ने भएका छन्। शुक्रबार बिहान प्रधानमन्त्रीको सरकारी निवास बालुवाटारमा नेपाली कांग्रेस, नेकपा माओवादी केन्द्र, नेकपा एकीकृत समाजवादी, जसपाका शीर्ष नेताहरूको बैठक तीन घन्टासम्म चलेको थियो।

बैठक राष्ट्रपति निर्वाचनमा केन्द्रित रहेको थियो। बैठकमा नेपाली कांग्रेसका सभापति शेरबहादुर देउवालगायतले राष्ट्रपतिमा आफूहरूलाई सहयोग गर्नुपर्ने प्रस्ताव राखेका थिए।

कांग्रेसबाहेक अन्य दलले पनि सहमतिको राष्ट्रपति उम्मेदवारबारे कुराकानी राखेका थिए। बैठकमा सहभागी कांग्रेस महामन्त्री गगन थापाले राष्ट्रपति निर्वाचनबारे बैठकमा छलफल भएको बताए। उनकाअनुसार आन्तरिक छलफल गरेर दलहरू पुन :आज साँझ ५ बजे बैठक बस्ने तयारी छ।

‘आज अपरान्ह ५ बजे फेरि बैठक बस्छ। त्यो बैठकले राष्ट्रपतिको उम्मेदवार तय गर्छ,’ महामन्त्री थापाले बालुवाटारमा पत्रकारहरूसँग संक्षिप्त कुराकानी गर्दै भने। आजको बैठकमा प्रधानमन्त्री पुष्पकमल दाहाल प्रचण्ड, कांग्रेस सभापति देउवा, एकीकृत समाजवादी अध्यक्ष माधवकुमार नेपाल, जसपा अध्यक्ष उपेन्द्र यादवलगायत नेताहरूबीच छलफल भएको थियो।

महामन्त्री थापाले दलहरूबीच छलफल सकारात्मक रहेको पनि बताए।