रौतहटमा दिउँसो साढे १२ बजेसम्म ३८ प्रतिशत मतदान, उत्साहजनक सहभागिता

रौतहट । रौतहटमा जारी प्रतिनिधिसभा सदस्य निर्वाचनमा मतदाताको उत्साहजनक सहभागिता देखिएको छ ।
बिहीबार बिहान ७ बजेदेखि सुरु भएको मतदान प्रक्रियामा दिउँसो १२ः३० बजेसम्म ३८ प्रतिशत मत खसेको जिल्ला निर्वाचन कार्यालय रौतहटले जनाएको छ ।
जिल्ला निर्वाचन अधिकारी छोटेलाल दासका अनुसार जिल्लाका चारवटै निर्वाचन क्षेत्रमा शान्तिपूर्ण ढंगले मतदान भइरहेको छ । हालसम्म करिब १ लाख ६५ हजार मतदाताले आफ्नो मताधिकार प्रयोग गरिसकेका छन्। रौतहटमा कुल ४ लाख ३६ हजार ६११ मतदाता रहेका छन् ।
निर्वाचन कार्यालयका अनुसार जिल्लाभर ५ सय ४१ मतदान केन्द्र र २७७ मतदान स्थलहरू तोकिएका छन् । मतदान प्रक्रियालाई सहज बनाउन जिल्ला अदालत गौर, गौर कारागार र इलाका प्रहरी कार्यालय चन्द्रनिगाहपुरमा गरी तीनवटा अस्थायी मतदान केन्द्रको समेत व्यवस्था गरिएको छ ।
शान्तिपूर्ण र निष्पक्ष निर्वाचन सुनिश्चित गर्न जिल्लाभर करिब १० हजार सुरक्षाकर्मी परिचालन गरिएको प्रमुख जिल्ला अधिकारी दिनेश सागर भुसालले जानकारी दिए। सुरक्षा संवेदनशीलताका आधारमा मतदान स्थलहरूलाई अतिसंवेदनशील, संवेदनशील र सामान्य गरि वर्गीकरण गरिएको छ ।
अतिसंवेदनशील क्षेत्रहरूमा नेपाली सेनाको हवाई गस्ती र थप कडाइ गरिएको छ । सुरक्षाको पहिलो घेरामा नेपाल प्रहरी र म्यादी प्रहरी, दोस्रोमा सशस्त्र प्रहरी र बाहिरी घेरामा नेपाली सेनाले सुरक्षा दिइरहेका छन् ।
बिहानैदेखि मतदान केन्द्रहरूमा वृद्धवृद्धा, युवा र महिलाहरूको लामो लाइन देखिएको छ। निर्वाचन प्रमुख दासले जिल्लाभर निकै उत्साहजनक र शान्तिपूर्ण वातावरणमा मतदान जारी रहेको बताउँदै बाँकी मतदातालाई पनि निर्धक्क भएर मतदान गर्न आग्रह गरेका छन् ।
सीमा क्षेत्रमा ७२ घण्टाका लागि आवागमन बन्द गरी सुरक्षा व्यवस्थालाई थप मजबुत बनाइएको छ । हालसम्म कतै पनि अप्रिय घटना नभएको र निर्वाचन प्रक्रिया सुचारु रहेको प्रशासनले जनाएको छ ।