चुनावी दौडमा रहेकी सपनाको भावुक प्रश्न : आखिर किन तोडियो उहाँको सालिक ?

काठमाडौं । ०७९ साल चैत १३ गते राष्ट्रपति रामचन्द्र पौडेलले काठमाडौं ढोकाटोलमा रहेको दिवंगत पूर्वमन्त्री नवीन्द्रराज जोशीको प्रतिमा अनावरण गर्दै जोशीको योगदानको स्मरण गरेका थिए ।

जनतासँग निकटतम सम्बन्ध राख्ने र उनीहरूका सुख दुःख बुझ्ने नेताका रुपमा चित्रण गरेका थिए । सोही समारोहमा जोशीको धर्मपत्नी सपना राजभण्डारी भावुक चेहेरामा सहभागि थिइन् ।

त्यसक्रममा सपनाले भनेकी थिइन,‘कसैको जीवनलाई समाजमा जीवन्त राख्न प्रतिमा स्थापना गर्नु राम्रो हो । उहाँले लिनुभएको राजनीतिक लक्ष्य पूरा गर्न तयार छु ।’

तर अनावरणको तीन बर्ष पूरा हुन नपाउँदै गत भदौ २३ र २४ गते भएको जेनजी पुस्ताको आन्दोलनमा सालिक तोडियो । आन्दोलनकारीहरुले सालिक फोडे । तर एकजना तरकारी पसलेले फालिएको सालिक बोराले बेरेर लुकाइदिएछन् ।

‘उहाँ सबैको प्रिय हुनुहुन्थ्यो, जनताका लागि धेरै काम गर्नुभएको थियो । सुशासनको पक्षमा र भ्रष्टाचारको विरुद्धमा सँधै उभिनुभयो । तरपनि सालिक तोडियो, हाम्रो घरमा तोडफोड गरियो । किनहोला ?’ सपनाले भावुक हुँदै भनिन्,‘आज हाम्रो सडकमा गुड्ने सफा टेम्पो उहाँकै पालामा आएको हो, टुँडिखेल उहाँले नै खाली गराउनुभयो । औषधी उद्योगलाई प्रोत्साहित गर्न धेरै काम गर्नुभयो । राम्रो काम गरेर जनताको मनमा बस्नुभएको थियो । सार्है सहज हुनुहुन्थ्यो । राम्रो छवि बनाउनुभएको थियो तरपनि आक्रमण गरियो नि ।’

तरकारी पसलेले बोराले बेरेर राखिएको सालिक घरमा ल्याएर राखेको बताएकी सपनाले नवीन्द्रराजको स्मृतिमा पुनः सालिक स्थापना गरिने बताइन् । चाक्सीबारीस्थित गणेशमान सिंह निवास, कुसुनजीको आश्रम र विराटनगरस्थित कोइराला निवासमा आगजनी भएकोप्रति पनि उनले दुःख व्यक्त गरिन् ।

वि.स २०१९ पुस २२ गते काठमाडौँमा जन्मिएका जोशीको विस २०७७ चैत १३ गते निधन भएको थियो । संविधानसभा सदस्य, उद्योगमन्त्री, काठमाडौँ महानगरपालिकाका उपप्रमुख, गणेशमान सिंह अध्ययन प्रतिष्ठानका संस्थापक अध्यक्षलगायत विभिन्न सामाजिक संस्थामा सक्रिय रहेका उनी स्वच्छ छवीका नेताका रुपमा चिनिएका थिए ।

काठमाडौँ निर्वाचन क्षेत्र नम्बर ८ बाट प्रत्यक्षतर्फ उम्मेद्वार रहेकी सपनाले नवीन्द्रको इमान्दारीता, निष्ठा र सपनालाई साकार पार्न आफू सक्रिय रहेको प्रतिक्रिया समेत दिइन् ।

युवा र उद्यमशीलताको क्षेत्रमा, काठमाडौंको दिगो विकास र विश्व सम्पदाहरूको संरक्षणमा जोड दिएकी उनले निष्ठाको राजनीतिबाट पनि स्थापित हुन सकिन्छ भन्ने नवीन्द्रको दृष्टिकोणलाई अपुरो रहन नदिने संकल्प समेत गरेकी छिन् । प्रत्यक्ष चुनावी अभियानमा रहेकी उनले आफूलाई मतदाताले जिताउने अपेक्षा राखेकी छिन् ।