प्रजातन्त्र दिवस : मधेश प्रदेशले छिन्नमस्ता भगवती मन्दिरमा दिप प्रज्जवलन गर्दै

काठमाडौं । मधेश प्रदेश सरकारले प्रजातन्त्र दिवस विभिन्न कार्याक्रम गरी मनाउने भएको छ । नेपाल न्यूज बैंकसंगको विशेष कुराकानीमा मधेश प्रदेशका गृह सञ्चार तथा कानुन मन्त्री राजकुमार लेखीले प्रदेश सरकारले प्रजातन्त्र दिवसमा विभिन्न कार्यक्रम गर्ने योजना रहेको जानकारी दिए ।

उनले फागुन ७ गते देश र संविधानको अवस्था, प्रजातन्त्र आएदेखिको उपलब्धिको विषयमा सरोकारवलाहरुसंग अन्तरक्रिया कार्यक्रम गर्नुका साथै सप्तरीको एतिहासिक छिन्नमस्ता भगवती मन्दिरमा ११००० दिप प्रज्जवलन गर्ने बताए । मन्त्री लेखीले प्रजातन्त्र सेनानीहरुको सम्मान प्रदेश सरकारले मात्रै नभएर सम्पूर्ण नेपालीले गर्नु पर्ने धारणा व्यक्त गरे ।

उनले प्रजातन्त्रको उपलब्धिले आज नेपाली जनताले खुलेर बाँच्न सक्ने अधिकार पाएको भन्दै प्रदेश सरकारले आगामी दिनमा प्रजातन्त्र दिवस अझ भव्य रुपमा मनाउने र प्रजातन्त्र सेनानी र उनका परिवारजनका लागि विशेष व्यवस्था गर्ने जानकारी दिए ।

मधेश प्रदेश सरकारले प्रत्येक वर्ष सहिद दिवस, बलिदानी दिवस, प्रजातन्त्र दिवस आदि धुमधामका साथ मनाउँदै आएको छ । सो क्रममा भोली फागुन ७ गत्ते प्रजातन्त्र दिवसको अवसरमा प्रदेश सरकारले दिप प्रज्जलन तथा अन्तरक्रिया कार्यक्रम गर्न लागेको हो ।