काठमाडौं। फ्रान्स फुटबल म्यागेजिनले प्रदान गर्ने बालोन डी’अर अर्जेन्टिनी कप्तान लियोनल मेसीले आठौं पटक जितेका छन् । मंगलबार पेरिसमा आयोजित अवार्ड घोषणा समारोहबाट मेसी विजेता चुनिएका हुन् । हरेक वर्ष प्रदान गरिने यो अवार्ड वर्षको उत्कृष्ट प्रदर्शन गर्ने खेलाडीलाई दिइन्छ ।
गत वर्ष कतारमा सम्पन्न फिफा विश्वकपको उपाधि मेसीकै कप्तानीमा अर्जेन्टिनाले जितेको थियो । अर्जेन्टिनालाई ३६ वर्षपछि विश्वकपको उपाधि दिलाउन मेसी प्रतियोगिताको उत्कृष्ट खेलाडी चुनिएका थिए । उनले विश्वकपमा कुल सात गोल गरेका थिए ।
मंगलबार मेसीले म्यानचेस्टर सिटी तथा नर्वेका एर्लिङ हाल्यान्ड र फ्रान्सका काइलियन एमबाप्पेलाई पछि पारे । हाल्यान्डले दोस्रो स्थान पाउँदा पेरिस सेन्ट जर्मन (पीएसजी) का एमबाप्पे तेस्रो भए ।
मेसीले यसअघि सन् २००९ देखि २०१२ सम्म लगातार चार पटक बालोन डी’अर जितेका थिए । यस्तै, सन् २०१५, २०१९ र २०२१ मा यो अवार्ड जितेका थिए ।
मंगलबार भएको समारोहबाट स्पेनकी आईताना बोनमती महिला बालोन डी’अर विजेता चुनिइन् । कोपा ट्रफी इङ्ल्यान्डका युवा फरवार्ड जुड बेलिङ्घमले, याचिन ट्रफी अर्जेन्टिनाका गोलकिपर इमिलियानो मार्टिनेजले र गर्ड मुलर अवार्ड हाल्यान्डले पाए ।
वर्षको उत्कृष्ट महिला क्लब बार्सिलोना चुनिदा पुरुषमा यो अवार्ड म्यानचेस्टर सिटीले पायो ।
प्रतिक्रिया