काठमाडौँ। नेपालमा आयोजना हुने टी–ट्वान्टी त्रिकोणात्मक क्रिकेट सिरिज खेल्ने नेपाली खेलाडीको घोषणा गरिएको छ । नेपाल क्रिकेट संघ (क्यान)ले रोहित पौडेलको कप्तानीमा १८ सदस्यीय टोली घोषणा गरेको हो ।
यस स्क्वाडमा लेग स्पिनर सन्दीप लामिछाने समावेश छैनन् । केही दिन पहिले सन्दीपले आफ्नो नाम राष्ट्रिय टोलीबाट फिर्ता लिएको घोषणा गरेका थिए । यता, टोलीमा ललितनारायण राजवंशी फर्किएका छन् । उनी यसअघि घाइते थिए ।
नेपालले पहिलो खेल यूएईसँग खेल्नेछ । प्रतियोगितामा नेपालसहित यूएई र हङकङ समावेश छन् । सिरिज कात्तिक १ गतेदेखि कात्तिक १० गतेसम्म काठमाडौँमा सञ्चालन हुँदैछ ।
नेपालले पहिलो खेल कात्तिक १ मा यूएईसँग र कात्तिक २ गते हङकङसँग खेल्नेछ । डबल राउण्ड रोबिन लिगका आधारमा सञ्चालन हुने प्रतियोगिताको शीर्ष दुई टिमले फाइनल खेल्नेछन् ।
कात्तिक १० गते सिरिजको फाइनल खेल हुनेछ । प्रतियोगिताको फाइनलबाहेक सम्पुर्ण खेल मुलपानी क्रिकेट मैदानमा हुनेछ । टी–ट्वान्टी विश्वकप छनोट खेल्न लागेको नेपालले तयारीस्वरुप त्रिकोणात्मक सिरिजको आयोजना गरेको हो ।
नेपाली टोली
रोहित पौडेल (कप्तान), आशिफ शेख, सोमपाल कामी, करण केसी, सन्दीप जोरा, कुशल भुर्तेल, कुशल मल्ल, विनोद भण्डारी, सागर ढकाल, ललित राजवंशी, लोकेश बम, सूर्य तामाङ, श्याम ढकाल, प्रतीश जिसी, दीपेन्द्रसिंह ऐरी, गुल्सन झा, विवेक यादव, अविनाश बोहरा ।
प्रतिक्रिया