टोटनहमविरुद्ध सिटीको शानदार जित

काठमाडौं । इङ्लिस प्रिमियर लिग फुटबलमा टोटनहम हस्पुरविरुद्ध म्यानचेस्टर सिटीले शानदार जित हासिल गरेको छ । बिहीबार राति इत्तिहाद स्टेडियममा भएको खेलमा सिटीले टोटनहमलाई हराउँदै शीर्ष स्थानको आर्सनलसँगको अंक दूरी ५ अंकमा झारेको छ ।

खेलको पहिलो हाफमा २–० गोल अन्तरले पछि परेको सिटीले उत्कृष्ट पुनरागमन गर्दै उपाधि होडलाई बलियो बनाएको हो ।

खेलको ४४औँ मिनेटमा डिजान कुलुसेभ्स्कीको गोलमा टोटनहमले सुरुवाती अग्रता बनाएको थियो। पहिलो हाफको अतिरिक्त समयमा इमर्सन रोयलले गोल गर्दै टोटनहमलाई २–० को अग्रता दिलाए ।

तर खेलको ५१औँ मिनेटमा जुलियन अल्भारेजले गोल गर्दै सिटीलाई खेलमा फर्काएका थिए । त्यसको २ मिनेटपछि नै इर्लिङ हालान्डले हेडर गोल गर्दै सिटीलाई बराबरीमा ल्याएका थिए ।

६३औँ मिनेटमा रियाद मारेजले गोल गर्दै सिटीलाई ३–२ को अवस्थामा ल्याए । खेलको अन्तिम मिनेटमा मारेजले नै व्यक्तिगत दोस्रो तथा टोलीका लागि चौथो गोल गर्दै जित पक्का गरे ।