कक्षा १२ को पूरक परीक्षा असोज ७ र ८ गते हुने

भक्तपुर । राष्ट्रिय परीक्षा बोर्डले कक्षा १२ को पूरक (मौका) परीक्षा असोज ७ र ८ गते सञ्चालन गर्ने भएको छ। यसअघि भदौ २८ र २९ गते तय गरिएको परीक्षा तालिका जेन–जी आन्दोलनका कारण संशोधन गरी बोर्डले नयाँ मिति सार्वजनिक गरेको हो।

बोर्डका अनुसार असोज ७ गते अनिवार्य अंग्रेजी विषयको परीक्षा हुनेछ। एक विषयमा मात्र पूरक परीक्षा दिने परीक्षार्थीले सोही दिन परीक्षा दिनेछन् भने दुई विषयमा परीक्षा दिने परीक्षार्थीले पहिलो दिन अनिवार्य अंग्रेजी र दोस्रो दिन अनिवार्य नेपाली विषयको परीक्षा दिनुपर्नेछ।

असोज ८ गते दुई विषयमा परीक्षा दिने विद्यार्थीका लागि आफूले परीक्षा दिने विषयमध्येको ठूलो कोड नम्बर भएको विषयको परीक्षा सञ्चालन गरिने बोर्डले जनाएको छ। बोर्डले परीक्षा केन्द्रहरू पहिल्यै निर्धारण गरिसकेको जनाएको छ।