काठमाडौं । जेनजी आन्दोलनपछि बनेको अन्तरिम सरकारले अन्तर्राष्ट्रिय समुदायको ध्यान तानेको छ । पूर्वप्रधानन्यायाधीश सुशीला कार्कीलाई अन्तरिम प्रधानमन्त्री नियुक्त गरेपछि भारत, चीन, अमेरिका लगायत देशहरूले बधाई दिँदै सहकार्यको घोषणा गरेका छन् ।
भदौ २३ र २४ गतेको विद्यार्थी–केन्द्रित प्रदर्शनमा ७२ जनाभन्दा बढीको मृत्यु भएपछि तत्कालीन प्रधानमन्त्री केपी शर्मा ओलीले राजीनामा दिएर बालुवाटर छाडे । राष्ट्रपतिले त्यसपछि कार्कीलाई अन्तरिम सरकारको नेतृत्व गर्न नियुक्त गर्दै संसद विघटन गरे ।
भारतको प्रतिक्रिया
भारतीय प्रधानमन्त्री नरेन्द्र मोदीले मणिपुरमा आयोजित सभामा नेपालको पछिल्लो घटनाक्रमबारे टिप्पणी गर्दै नेपालको युवापुस्ताको सकारात्मक भूमिकाको प्रशंसा गरे । उनले सुशीला कार्कीलाई नेपालको पहिलो महिला प्रधानमन्त्रीका रूपमा बधाई दिँदै नेपालमा शान्ति, स्थिरता र समृद्धिको मार्ग प्रशस्त गर्ने विश्वास व्यक्त गरे । भारतीय विदेश मन्त्रालयले पनि विज्ञप्ति जारी गरी नेपालसँग मिलेर काम गर्ने प्रतिबद्धता दोहोर्यायो ।
चीनको प्रतिक्रिया
बेइजिङमा आयोजित पत्रकार सम्मेलनमा चिनियाँ विदेश मन्त्रालयका प्रवक्ताले कार्कीलाई अन्तरिम प्रधानमन्त्री बनेकोमा बधाई दिए । चीनले नेपालले रोजेको विकासमार्गको सम्मान गर्ने बताउँदै द्विपक्षीय सम्बन्ध अझै बढाउने तयारी व्यक्त गर्यो ।
अमेरिकाको प्रतिक्रिया
काठमाडौंस्थित अमेरिकी दूतावासले विज्ञप्ति जारी गर्दै गत हप्ताको हिंसात्मक घटनापछि शान्तिपूर्ण समाधान भएकोमा स्वागत गर्यो । दूतावासले राष्ट्रपति, युवा नेता र नेपाली सेनाको भूमिकाको प्रशंसा गर्दै अन्तरिम सरकारले आगामी निर्वाचनको तयारी गर्दा सहकार्य गर्ने जनाएको छ ।
साझा धारणा
भारत, चीन र अमेरिकाले नेपालको अन्तरिम सरकारलाई बधाई दिँदै परिवर्तनलाई स्वीकार गरेका छन् । तिनै मुलुकले अन्तरिम सरकारले अगाडि बढाउने राजनीतिक प्रक्रियामा सहकार्य गर्ने तयारी व्यक्त गरेका छन् ।
अन्य देशको प्रतिक्रिया
बेलायतले पनि कार्कीको नियुक्तिलाई महत्वपूर्ण बताउँदै समावेशी शासन र लोकतान्त्रिक प्रक्रियामा समर्थन दोहोर्याएको छ ।
प्रतिक्रिया