अपाङ्गता भएका नागरिकलाई न्यानो कपडा वितरण

रामेछाप । रामेछाप नगरपालिकाले अपाङ्गता भएका ज्येष्ठ नागरिकलाई न्यानो कपडा वितरण गरेको छ ।

नगरपालिकाको वडा नं ८ का ‘क र ख’ वर्गका अपाङ्गता भएका नागरिकलाई कपडा वितरण गरिएको हो । 

वडा नं ८ का वडाध्यक्ष सन्तोषकुमार तामाङको अध्यक्षतामा भएको कार्यक्रममा उपाध्यक्ष बालाकुमारी कार्कीले ज्येष्ठ नागरिकलाई न्यानो कपडा ब्ल्याङ्केट वितरण गरिन् ।  

कार्यक्रममा ३० जना अपाङ्गता भएकालाई न्यानो कपडा वितरण गरिएको छ ।  सो वडामा क र ख वर्गका ३० जना अपाङ्गता भएका नागरिक रहेका नगरपालिकाको महिला तथा बालबालिका शाखाकी सरिता बुढाथोकीले जानकारी दिइन् ।

सोही कार्यक्रममा बालविवाह र त्यसको असरको बारेमा सचेतना कार्यक्रम समेत सञ्चालन गरिएको थियो ।