हल्का वर्षाको सम्भावना

काठमाडाैं । हाल देशभर पश्चिमी वायु साथै स्थानीय वायुकोसमेत सामान्य प्रभाव रहेको मौसम पूर्वानुमान महाशाखाले जनाएको छ ।

अहिले कोसी प्रदेश, बागमती प्रदेश र गण्डकी प्रदेशका पहाडी भू-भागको मौसम आंशिक बदली छ भने बाँकी भूभागको मौसम मुख्यतया सफा छ । तराई भूभागका थोरै स्थानमा अहिले हुस्सु र कुहिरो लागेको छ ।

आज दिउँसो पनि कोसी प्रदेश, बागमती प्रदेश र गण्डकी प्रदेशका पहाडी भूभागमा आंशिक बदली रहने छ । बाँकी भू-भागमा मौसम मुख्यतया सफा रहने अनुमान छ ।

कोसी प्रदेश र गण्डकी प्रदेशका पहाडी भू-भागका एक/दुई स्थानमा दिउँसो हल्का वर्षाको सम्भावना रहेको महाशाखाले जनाएको छ ।

आज राति पनि कोसी प्रदेश र गण्डकी प्रदेशका पहाडी भूभागमा आंशिक बदली रहने छ । बाँकी भूभागको मौसम मुख्यतया सफा रहने महाशाखाले आइतबार बिहान ६ बजे जारी गरेको बुलेटिनमा उल्लेख छ ।