२०८४ को चुनावमा गठबन्धन बनाउन नमिल्ने कानुनी व्यवस्था गर्न आवश्यक छ : रवि लामिछाने

काठमाडौँ। राष्ट्रिय स्वतन्त्र पार्टीका संसदीय दलका नेता रवि लामिछानेले आगामी निर्वाचनका बेला राजनीतिक दलहरूबिच गठबन्धन बनाउन नमिल्ने कानुनी व्यवस्था गर्न आवश्यक रहेको बताएका छन् । बुधवार प्रतिनिधि सभा अन्तर्गत रहेको राज्य व्यवस्था तथा सुशासन समितिको बैठकमा निर्वाचन आयोगका पदाधिकारीहरूसँगको छलफलका क्रममा लामिछानेले सो सम्बन्धी कानुनी प्रावधान राख्न आवश्यक रहेको बताए ।

उनले निर्वाचन आयोगले बनाउन लागेको एकीकृत निर्वाचन कानुनको मस्यौदामा सर्वोच्च अदालतले जारी गरेको आदेश अनुसारको नो भोट (राइट टु रिजेक्ट) को व्यवस्था राख्न समेत माग गरे । २०३५ सालको जनमत सङ्ग्रहको बेला पेरिसमा रहेका नेपालीले समेत मतदानको अवसर पाएको बताउँदै उनले अहिलेको समयमा यसको प्रबन्ध गर्न नसकिने प्रश्न नरहेको बताए ।

यस्तै विदेशमा बस्ने नेपालीको मताधिकारलाई सुनिश्चित गर्ने कानुनी व्यवस्था गर्नुपर्नेमा पनि लामिछानेले जोड दिएका छन् । यता प्रमुख निर्वाचन आयुक्त दिनेशकुमार थपलियाले संसद्ले त्यस किसिमको कानुन बनाएमा कार्यान्वयन गर्न आयोग तयार रहेको जवाफ दिएका थिए ।