भैरहवा । रुपन्देही जिल्लामा गत असोज महिनामा १३२ वटा अपराधका मुद्दा दर्ता भएका छन् । तीमध्ये ज्यानसम्बन्धी २७, आमहत्या १६, चोरी ७, संगठित तथा आर्थिक अपराध ४९, सामाजिक अपराध ६, महिला बालिबालिकासम्बन्धी अपराध ११, सवारीसम्बन्धी १४ र विविध २ वटा रहेका छन् ।
फैसला कार्यान्वयनतर्फ ८० जना फरार प्रतिवादी पक्राउ गरी उनीहरुबाट १ करोड ९ लाख ६ हजार ३ सय ७१ रुपैयाँ जरिवाना र ६ वर्ष ७ महिना ८ दिन कैद तथा सजाय असुलउपर भएको प्रहरीले जनाएको छ । त्यस्तै चालु मुद्दाको प्रतिवादी पक्राउ संख्या ११३ जना रहेको छ ।
प्रहरीका अनुसार महिला तथा जेष्ठ नागरिकसँग सम्बन्धित घरेलु हिंसातर्फ ९५ र महिला छिमेकीसँग झगडा (ठाडो निवेदन) ५३ वटा दर्ता भएकोमा घरेलु हिंसाका ७३ र ठाडो निवेदनका ४७ वटा मिलापत्र भएको छ ।
त्यस्तै असोजमा लागूऔषधसम्बन्धी १० वटा मुद्दा दर्ता भएको र १७ जनालाई पक्राउ गरिएको जिल्ला प्रहरी कार्यालय, रुपन्देहीका सूचना अधिकारी तथा प्रहरी नायव उपरीक्षक (डीएसपी) कृष्ण कुमार चन्दले जानकारी दिए । पक्राउ परेका व्यक्तिहरुबाट विभिन्न लागूऔषध बरामद भएको उनले बताए ।
गत महिनामा रुपन्देहीमा १६ वटा आत्महत्याका घटना भएका छन् । आत्महत्या गर्नेमा १४ जना पुरुष र २ जना महिला रहेका छन् ।
असोजमा जिल्लामा १७५ वटा सवारी दुर्घटना भएको र ८ जनाको मृत्यु भएको छ । दुर्घटनामा परी घाइते हुनेको संख्या २९२ जना रहेको प्रहरीले जनाएको छ । चेकिङ्गको क्रममा ३ हजार २ सय १९ वटा सवारीसाधनमाथि कारवाही गरिएको र जसबाट ५५ लाख ८८ हजार ५ सय रुपैयाँ राजस्व संकलन भएको छ ।
राजस्व चुहावट तथा भन्सार छली नियन्त्रणतर्फ अवैध भन्सार छलीको कुल राजस्व १ करोड ७० लाख ३२ हजार ४५ रुपैयाँ संकलन भएको छ । भन्सार छलीमा संलग्न ९ जनालाई पक्राउ गर्नुका साथै २५ वटा सवारीसाधन नियन्त्रणमा लिइएको प्रहरीको भनाइ छ ।
असोेजमा रुपन्देहीमा विपद्को २१ वटा घटना भएका छन् । कार्यक्षमताको आधारमा उत्कृष्ट कार्यसम्पादन गर्ने ३१ जना प्रहरी कर्मचारीलाई पुरस्कृत गरिएको डीएसपी चन्दले जानकारी दिए ।
प्रतिक्रिया