काठमाडौं । प्रधानमन्त्री वालेन्द्र शाहले भ्रष्टाचार र दण्डहीनताको अन्त्य गर्दै सुशासन कायम गर्नु सरकारको प्रमुख प्राथमिकता रहेको बताएका छन् ।
संविधान दिवस तथा राष्ट्रिय दिवस, २०८३ का अवसरमा आयोजित मूल समारोहलाई सम्बोधन गर्दै प्रधानमन्त्री शाहले संविधान राम्रो भए पनि त्यसलाई कार्यान्वयन गर्ने निकाय र व्यक्तिहरू इमानदार तथा सक्रिय नभए संविधान कागजमै सीमित हुने बताए ।
‘यो सुरुवात हो, अन्त्य होइन,’ प्रधानमन्त्री शाहले भने, ‘भ्रष्टाचार र दण्डहीनताको जरो गहिरो छ। तर त्यो जरो उखेल्ने हातहरू अब झन् बलिया छन्, झन् धेरै छन्।’
सरकारले सुशासन कायम गर्न प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासनमा राजनीतिक तटस्थता तथा सरकारी र सार्वजनिक पदमा योग्यतामा आधारित नियुक्ति प्रक्रिया अवलम्बन गरेको उनले बताए।
‘सुशासन नारा होइन, काम हो। र हामी काम गरिरहेका छौँ,’ प्रधानमन्त्री शाहले भने।
संघ, प्रदेश र स्थानीय तहबीच सहकारिता, सहअस्तित्व र समन्वयका आधारमा राष्ट्र विकासको साझा उद्देश्य हासिल गर्न संघीय सरकार प्रतिबद्ध रहेको उनले बताए।
प्रधानमन्त्री शाहले सरकार डिजिटल प्रविधि, कृत्रिम बुद्धिमत्ता, साइबर सुरक्षा, नवप्रवर्तन र स्टार्टअपलाई प्राथमिकतामा राखेर ज्ञानमा आधारित अर्थतन्त्र निर्माणतर्फ अघि बढिरहेको बताए। डिजिटल सुशासन ब्लुप्रिन्टअनुसार राष्ट्रिय डिजिटल पूर्वाधार निर्माणलाई त्यसको आधारका रूपमा अघि बढाइने उनको भनाइ छ।
‘युवाले सडकमा मागेको सुशासन हामी प्रविधिबाट पनि सुनिश्चित गर्छौँ,’ उनले भने।
प्रधानमन्त्री शाहले हालैको रसुवा–भोटेकोशी बाढीबाट भएको क्षतिप्रति दुःख व्यक्त गर्दै बाढीमा परी मृत्यु भएका स्वदेशी तथा विदेशी नागरिकप्रति श्रद्धाञ्जली अर्पण गरे। उनले मृतकका परिवारप्रति समवेदना तथा घाइतेको शीघ्र स्वास्थ्यलाभको कामना गरे।
बाढीपछि उद्धार तथा राहतमा सहयोग गर्ने मित्रराष्ट्र, अन्तर्राष्ट्रिय समुदाय, संघसंस्था, निजी क्षेत्र, राष्ट्रसेवक कर्मचारी तथा आम नागरिकप्रति प्रधानमन्त्री शाहले धन्यवाद व्यक्त गरे।
नेपाल उच्च विपद् जोखिममा रहेको उल्लेख गर्दै उनले विपद् आएपछि मात्रै नभई जोखिम न्यूनीकरण र पूर्वतयारीमै जोड दिनुपर्ने बताए। विपद् जोखिम न्यूनीकरण, पूर्वतयारी र प्रतिकार्यलाई प्राथमिकतामा राख्दै पूर्वसूचना प्रणाली कार्यान्वयनमा ल्याइने उनले जानकारी दिए।
प्रधानमन्त्री शाहले संविधानले विविधताबीचको एकता, विभेद र असमानताको अन्त्य तथा विकास, समृद्धि र सामाजिक न्यायमा आधारित समतामूलक समाज निर्माणको वाचा गरेको बताए।
प्रतिस्पर्धात्मक बहुदलीय लोकतन्त्र, मानव अधिकार र कानूनी शासन राष्ट्रिय जीवनका आधार भएको उल्लेख गर्दै उनले संविधानको अक्षर र भावनाप्रति सरकार पूर्ण प्रतिबद्ध रहेको बताए।
उनले संविधान दिवस हरेक वर्ष आउने भए पनि संविधानको वास्तविक कार्यान्वयन नागरिकले अनुभूति गर्ने गरी गर्नुपर्ने बताए।
‘संविधान पूरा हुने दिन हामीले आफैँ ल्याउनुपर्छ—हरेक इमानदार निर्णयबाट, हरेक पारदर्शी नियुक्तिबाट, नागरिकको घरदैलोमा पुग्ने हरेक सेवाबाट,’ प्रधानमन्त्री शाहले भने।
जनताले सुशासन, विकास, समृद्धि र सामाजिक न्यायको अपेक्षा गरेको भन्दै उनले सरकारका हरेक कदम ती आकांक्षा पूरा गर्न केन्द्रित रहने बताए।
प्रतिक्रिया