गंगा दाहालले प्रचण्डको सचिवालयबाट राजीनामा दिइन्

काठमाडौं । नेकपा (माओवादी केन्द्र) का संयोजक तथा प्रधानमन्त्री पुष्पकमल दाहाल ‘प्रचण्ड’ की छोरी गंगा दाहालले संयोजकको सचिवालयबाट राजीनामा दिएको घोषणा गरेकी छन्।

दाहालले सोमबार सार्वजनिक वक्तव्य जारी गर्दै आफूलाई देखाएर निरन्तर बुवा प्रचण्ड र पार्टीविरुद्ध योजनाबद्ध रूपमा प्रहार गरिएको आरोप लगाउँदै उक्त जिम्मेवारीबाट आफू अलगिएको जानकारी दिएकी हुन्।

“निरन्तर मलाई देखाएर पार्टी संयोजक र समग्र माओवादी केन्द्रविरुद्ध योजनावद्ध प्रहार भइरहेका कारणले सचिवालयबाट राजीनामा दिएको छु,” उनले वक्तव्यमा उल्लेख गरेकी छन्।

उनले सचिवालयमा रहँदा सहयोग गर्ने सबै नेता, कार्यकर्ता र आम नागरिकप्रति आभार व्यक्त गर्दै आफू अझै पनि पार्टीमा जिम्मेवार कार्यकर्ता रूपमा क्रियाशील रहने बताएकी छन्। साथै, उनले केही सञ्चारमाध्यममा आफूसम्बन्धी भ्रामक समाचारहरू प्रकाशित भएको दाबी गर्दै त्यसप्रति ध्यानाकर्षण गराएकी छन्।

गंगा दाहाल पछिल्लो समय माओवादी केन्द्रभित्रको आन्तरिक निर्णय प्रक्रियामा प्रभावशाली रूपमा सक्रिय रहिएकी थिइन्।