काठमाडौं — नेपाल आयल निगमले पेट्रोलको मूल्य घटाएको छ भने डिजेल र मट्टीतेलको मूल्य यथावत् राखिएको छ। निगमले बुधबार राति एक सूचना जारी गर्दै पेट्रोलको मूल्य प्रतिलिटर दुई रुपैयाँले घटाइएको जानकारी दिएको हो। नयाँ मूल्य बिहीबार बिहानदेखि लागू भएको छ।
नयाँ मूल्यअनुसार, पेट्रोलको खुद्रा बिक्री दर पहिलो वर्गका लागि प्रतिलिटर १५८ रुपैयाँ ५० पैसा, दोस्रो वर्गका लागि १६० रुपैयाँ, र तेस्रो वर्गका लागि १६१ रुपैयाँ निर्धारण गरिएको छ।
निगमका अनुसार चारआली, विराटनगर, जनकपुर, अमलेखगन्ज, भलबारी, नेपालगञ्ज, धनगढी र वीरगञ्ज क्षेत्रहरू पहिलो वर्गमा पर्दछन्। सुर्खेत र दाङ दोस्रो वर्गमा राखिएका छन् भने काठमाडौं, पोखरा र दीपायल तेस्रो वर्गमा समावेश छन्।
निगमले पछिल्लो अन्तर्राष्ट्रिय मूल्य समायोजनअनुसार मूल्य परिमार्जन गरिएको स्पष्ट पारेको छ। डिजेल र मट्टीतेलको मूल्य भने अहिलेको अवस्थामा अपरिवर्तित राखिएको छ।
प्रतिक्रिया