सिन्धुलीमा जेनजी आन्दोलन : १३ कार्यालय र ६ घरमा तोडफोड तथा आगजनी

रामेछाप । भदौ २३ र २४ गतेको जेनजी आन्दोलनका क्रममा सिन्धुलीमा ठूलो तोडफोड र आगजनीका घटना भएका छन् ।

सो क्रममा १३ वटा सरकारी तथा गैरसरकारी कार्यालयमा क्षति पुग्नुका साथै ६ जना जनप्रतिनिधि र स्थानीय व्यक्तिहरूको घरमा समेत आगजनी, तोडफोड र लुटपाट भएको जिल्ला प्रशासन कार्यालय सिन्धुलीले जनाएको छ ।

आन्दोलनकारीहरूले जिल्ला प्रशासन कार्यालय, जिल्ला अदालत, कमलामाई नगरपालिका, मालपोत कार्यालय, जिल्ला समन्वय समिति, करदाता सेवा कार्यालय, नेपाल बार एसोसिएसन जिल्ला वार इकाई, कमलामाई नगरपालिका वडा नं ४, ५ र ६ का कार्यालयहरूमा तोडफोड र आगजनी गरेका छन् ।

यसैगरी नेकपा (एमाले), नेपाली कांग्रेस र माओवादी केन्द्रका पार्टी कार्यालयमा समेत क्षति पुगेको प्रशासनले जनाएको छ ।

जिल्ला प्रशासन कार्यालयका अधिकांश कागजात, तथ्याङ्क डाटा सेन्टर र नागरिकता, राहदानी, प्रशासन र मुद्दा फाँटका अभिलेख जलेका छन् ।

प्रमुख जिल्ला अधिकारी दिनेशसागर भुसालका अनुसार कार्यालयका २७ वटा कम्प्युटर, प्रिन्टरसहितका उपकरणमध्ये केही जलाइएका र केही चोरी भएका छन् ।

जिल्ला अदालतका करिब आठसय मुद्दाका मिसिल, कम्प्युटर र विद्युतीय सामग्री जलेका छन् । बार भवनमा समेत कागजात बाहिर निकालेर आगो लगाइएको छ ।

कमलामाई नगरपालिका र विभिन्न वडा कार्यालय, पञ्जिकरण, शिक्षा, वातावरण, महिला तथा बालबालिका, करलगायतका शाखामा रहेका सम्पूर्ण फर्निचर, कागजात र उपकरण तोडफोड तथा चोरी भएको छ । करदाता सेवा कार्यालय, मालपोत कार्यालय र नगरपालिका भवनका कागजात, कम्प्युटर र विद्युतीय सामग्री पनि जलाइएका छन् ।

आन्दोलनकारीले पाँचवटा सरकारी सवारीसाधन जलाएका छन् । कमलामाई नगरपालिकाको बोलेरो र स्कारपियो, मालपोत कार्यालय र प्रशासन कार्यालयका मोटरसाइकल, करदाता सेवा कार्यालयको स्कुटर जलेर नष्ट भएका छन् । सरसफाइ गाडी, दमकलसहितका अन्य सवारीसाधनमा पनि क्षति पुगेको छ ।

जनप्रतिनिधिहरूको निजी घरमा समेत तोडफोड र लुटपाट भएको छ । कांग्रेस सभापति तथा नगर प्रमुख उपेन्द्रकुमार पोखरेलको पुख्र्यौली घरमा गरगहना, नगद र सामग्री लुटपाट हुनुका साथै गोठमा रहेका गाई जलेर घाइते भएका छन् ।

नेकपा (एमाले) अध्यक्ष महेन्द्रदेव श्रेष्ठ, विघटित प्रतिनिधिसभा सदस्य श्याम घिमिरे र लेखनाथ दाहाल, प्रदेशसभा सदस्य छेत्रबहादुर बम्जन र कमलामाईका पूर्व मेयर खड्ग खत्रीका घरमा पनि आगजनी र तोडफोड भएको छ ।

आन्दोलनकै क्रममा सिन्धुली जेल फोरेर भागेका कैदीबन्दीहरू फर्कने क्रम जारी रहेको प्रशासनले जनाएको छ ।