काठमाडौं । पाकिस्तानका प्रधानमन्त्री इमरान खानविरुद्वको अविश्वास प्रस्ताव खारेज भएको छ ।
उपसभामुख कासिम खान सुरीले अविश्वासको प्रस्ताव असंवैधानिक रहेको भन्दै खारेज गरिदिएका हुन् ।
खानविरुद्वको अविश्वास प्रस्ताव खारेज भएपछि खानले राष्ट्रको नाममा सम्बोधन गर्दै चुनावको घोषणा गर्दै संसद विघटन गर्न राष्ट्रपति सिफारिस गरेको जानकारी दिएका छन् ।
खानलाई सत्तामा बस्न ३ सय ४२ मत मध्ये १ सय ७२ मत आवश्यक हुन्छ जसमा उनका सहयोगी तथा विश्वासपात्र मुत्ताहिदा कौदा विपक्षी पार्टीमा प्रवेश गरेपछि उनी अल्पमतमा परेका थिए । उनी १ सय ६४ मा पुगेका थिए भने विपक्षीको साथमा १ सय ७६ पुगेको थियो ।
यसैबीच, अविश्वासको प्रस्ताव खारेज भएसँगै संभावित हिंसालाई रोक्न भन्दै सुरक्षा व्यवस्था कडा पारिएको छ । राजधानी इस्लामाबादमा ठूला जमघट तथा मोटरसाइकल चलाउन रोक लगाइएको छ ।
विपक्षी पार्टीहरुले विशाल विरोध प्रदर्शनको तयारी गरेकाले हिंसा भड्किन सक्ने आशंका गरिएको छ ।
प्रतिक्रिया