हङकङ। हङकङको ताई पो जिल्लास्थित वाङ फुक कोर्ट हाउजिङ इस्टेटमा बुधबार भएको भीषण आगोमा १२८ जनाको मृत्यु भएको छ भने करिब २०० जना अझै बेपत्ता छन्। यस घटनापछि हङकङ सरकारले तीन दिनको राष्ट्रिय शोक घोषणा गरेको छ।
चीन सरकारले देशभरका गगनचुम्बी भवनमा आगो सुरक्षा उपायको जाँच सुरु गरेको छ। शनिबार हङकङका उच्च अधिकारीहरूले सरकारी मुख्यालयबाहिर तीन मिनेट मौन धारण गरे। यस कार्यक्रममा हङकङका प्रमुख कार्यकारी प्रमुख जोन ली पनि सहभागी थिए। शोक अवधिभर सोमबारसम्म सरकारी भवनहरूमा राष्ट्रिय झन्डा आधा झुकाइनेछ।
दमकलकर्मीहरूले आगो नियन्त्रणमा लिन करिब ४० घण्टा खर्च गरेका थिए। अधिकारीहरूले आगोको कारण पत्ता लगाउने प्रयास गरिरहेका छन्।
हङकङ सरकारले पीडितका लागि ३ करोड ८५ लाख डलरको राहत कोष स्थापना गरेको छ। कुल आठ भवनमध्ये सात भवन आगोको चपेटामा परेको थियो।
यो हङकङमा विगत ७५ वर्षमा भएको सबैभन्दा ठूलो आगलागी हो। सन् १९४८ मा गोदाममा लागेको आगोमा १७६ जनाको मृत्यु भएको थियो।
प्रतिक्रिया