रसुवा । गत असार २४ गते रसुवामा आएको भीषण बाढीमा बेपत्ता भएका प्रहरी जवान मुन्ना ठाकुरको परिवारले एक महिनासम्म खोजीमा कुनै सफलता नपाएपछि उनलाई मृत घोषित गर्दै शुक्रवार कुशको शव बनाएर दाहसंस्कार गरेको छ।
ठाकुर रसुवास्थित नेपाल–चीन सीमामा ड्युटीमा खटिएका बेला ल्हेन्दे खोला र भोटेकोशी खोलाको संगमस्थलमा आएको बाढीले बेपत्ता भएका थिए। उक्त बाढीले सीमावर्ती क्षेत्रमा ठूलो जनधनको क्षति पुर्याएको र केही प्रहरी संरचनाहरू पनि बगाएको पुष्टि भएको छ।
परिवारजन र आफन्तहरूले हिन्दू परम्पराअनुसार शव नफेला परेको अवस्थामा कुशबाट निर्मित पुत्लालाई शव मान्दै अन्त्येष्टि गरेका हुन्। यस घटनाले राज्यको उद्धार प्रणालीमा कमजोरी रहेको प्रश्न पनि उठाएको छ।
प्राकृतिक विपत्तिमा हराएका सुरक्षाकर्मीको अवस्थाबारे समयमै जानकारी नदिन सकिनु गम्भीर चुनौतीका रूपमा देखिएको छ। मृतक जवान ठाकुरको परिवारले अझै पनि उनको प्रतिक्षा गरिरहेको बताउँदै सामाजिक र धार्मिक कारणले बाध्य भएर दाहसंस्कार गर्नुपरेको जनाएको छ।
यसैबीच, राज्यबाट पीडित परिवारलाई राहत तथा सम्मानजनक सहयोग दिनुपर्ने आवाजहरू उठ्न थालेका छन्। सुरक्षाकर्मीहरूको सेवा जोखिमपूर्ण भए पनि सेवा क्रममा बेपत्ता हुने अवस्थामा राज्यको दायित्व थप गम्भीरतापूर्वक लिनुपर्ने माग गरिएको छ।
प्रतिक्रिया