काठमाडौं । एसियाका विभिन्न देशहरूमा चरम मौसमी अवस्थाका कारण बाढी, गर्मी र त्यसबाट हुने स्वास्थ्य जोखिम तीव्र रूपमा बढेका छन्। चीन, भारत र पाकिस्तानमा मुसलधारे वर्षासँगै बाढीको जोखिम बढ्दो छ भने जापान, दक्षिण कोरिया र भियतनाममा अत्यधिक गर्मीका कारण जनजीवन प्रभावित भएको छ।
चीनको दक्षिणी क्षेत्रमा लगातार भारी वर्षा भइरहेको छ। ग्वाङडोङ प्रान्तको राजधानी गुआङ्झाउमा मौसमका कारण सयौं उडान रद्द भएका छन्। राजधानी बेइजिङदेखि आर्थिक केन्द्र सांघाईसम्म बाढीले क्षति पुर्याएको छ। अधिकारीहरूले लामखुट्टेबाट सर्ने चिकनगुनिया भाइरसको जोखिमसमेत बढेको जनाएका छन्।
भारतको उत्तराखण्ड राज्यमा भारी वर्षाका कारण आकस्मिक बाढी आएको छ। सयौँ व्यक्ति अझै बेपत्ता छन्। प्रशासनले सम्भावित क्षति न्यूनीकरण गर्न उच्च सतर्कता अपनाएको जनाएको छ।
पाकिस्तानमा जुन महिनादेखि वर्षासम्बन्धी घटनाहरूमा ३०० भन्दा बढीको मृत्यु भएको छ, जसमा एक सयभन्दा बढी बालबालिका छन्। बाढीले सयौं घर ध्वस्त बनाएको छ। सेभ द चिल्ड्रेनका अनुसार पञ्जाब प्रान्तमा करिब २५ प्रतिशत विद्यालयहरू आंशिक वा पूर्ण रूपमा क्षतिग्रस्त भएका छन्।
जापानको गुन्मा प्रान्तस्थित इसेसाकी सहरमा तापक्रम ४१.८ डिग्री सेल्सियस मापन गरिएको छ। अधिकारीहरूका अनुसार सन् २०२५ को जून र जुलाई महिनाहरू अहिलेसम्मकै सबैभन्दा तातो रहेका छन्। गर्मीका कारण ५६ जनाको मृत्यु भइसकेको छ भने रेलसेवा पनि प्रभावित भएको छ।
दक्षिण कोरियामा पनि गर्मीका कारण आपतकालीन सेवामा चाप बढेको छ। गर्मीसँग सम्बन्धित बिरामीको संख्या अस्पतालहरूमा तीव्र गतिमा बढिरहेको छ। भियतनामका केही भागमा पनि गर्मीले जनजीवन प्रभावित पारेको अन्तर्राष्ट्रिय सञ्चारमाध्यमहरूले जनाएका छन्।
विश्व मौसम विज्ञान संगठन (WMO) का अनुसार विश्वव्यापी तापमान औसतभन्दा दोब्बर दरले बढिरहेको छ। जलवायु जोखिम सूचकांकअनुसार एसिया तीन दशकदेखि बाढी, खडेरी र गर्मीका लहरहरूबाट अत्यधिक प्रभावित हुँदै आएको छ।
प्रतिक्रिया