लागू औषधसहित काठमाडौं उपत्यकाबाट ५ जना पक्राउ

काठमाडौं – काठमाडौं उपत्यकाका विभिन्न स्थानबाट प्रहरीले निषेधित लागू औषध नाइट्राभेट र ट्रामाडोल ट्याबलेटसहित ५ जनालाई पक्राउ गरेको छ।

२०७९ साउन १४ गते साँझ ६:५० बजे काठमाडौंको गोकर्णेश्वर नगरपालिका वडा नं. २ नयागाउँस्थित सडक खण्डमा एक व्यक्तिको साथमा लागू औषध ओसारपसार भई रहेको भन्ने सूचनाको आधारमा प्रहरी टोली खटिएको थियो। उक्त स्थानमा चेकजाँच गर्दा मनिष नाम गरेका व्यक्तिको साथबाट ६०० ट्याबलेट नाइट्राभेट बरामद गरिएको थियो। उनीमाथि तत्काल नियन्त्रणमा लिई अनुसन्धान थालिएको छ।

त्यसै दिन राति ९:०० बजे काठमाडौं महानगरपालिका वडा नं. १४ स्थित एकान्तकुनामा बा २ ख २५९६ नम्बरको मिनी ट्रक शंका लागि जाँच गर्दा उक्त ट्रकमा ११२० ट्याबलेट ट्रामाडोल फेला परेको हो। लागू औषध ओसारपसारमा संलग्न ती व्यक्तिहरूसहित ट्रकलाई नियन्त्रणमा लिई थप अनुसन्धान गरिएको प्रहरीले जनाएको छ।

पक्राउ पर्नेहरूमा कालिकोट स्थायी घर भई हाल गोकर्णेश्वर नगरपालिका–४ नयागाउँ बस्ने २५ वर्षीय सरोज शाही, सिन्धुपाल्चोकको इन्द्रावती घर भई हाल गोकर्णेश्वर नगरपालिका–४ भगवती चोक बस्ने २६ वर्षीय सुनिल तामाङ, रोल्पाको खानी खोला गाउँपालिका–५ घर भई हाल गोकर्णेश्वर नगरपालिका–४ नयागाउँ बस्ने २९ वर्षीय दिपेश मगर, कैलालीको घर भई २४ वर्षका आशिष बिक र २६ वर्षीय मनिलाल गुरुङ रहेका छन्।

पक्राउ परेकामाथि लागू औषध (नियन्त्रण) ऐन अन्तर्गत मुद्दा दर्ता गरी थप अनुसन्धान भइरहेको जिल्ला प्रहरी परिसर, काठमाडौंले जनाएको छ।