एफए कप : रिडिङमाथि म्यानचेस्टर युनाइटेडको जित

काठमाडौं । एफए कपको पाँचौँ राउन्डमा पुग्न म्यानचेस्टर युनाइटेडले रिडिङलाई हराएको छ । शनिबार राति ओल्ड ट्राफोर्डमा भएमो खेलमा युनाइटेडले रिडिङलाई ३–१ गोल अन्तरले हराएको हो ।

युनाइटेडको जितमा क्यासेमिरो एक्लैले दुई गोल गरे । क्यासेमिरोले खेलको ५४औँ मिनेटमा गोल गर्दै टोलीलाई सुरुवाती अग्रता दिलाएका थिए । ५८औँ मिनेटमा व्यक्तिगत दोस्रो गोल गर्दै टोलीको अग्रता दोब्बर पारे ।

रिडिङ खेलको ६५औँ मिनेटमा १० खेलाडीमा समेटिएको थियो । रिडिङका कारोल दोहोरो पहेँलो कार्ड खाँदै मैदान छाडे । त्यसको एक मिनेटमा नै युनाइटेडका फ्रेडले गोल गर्दै अग्रता ३–० मा ल्याए । तर खेलको ७२औँ मिनेटमा एमबेङ्गेको गोलमा खेललाई ३–१ को अवस्थामा पुर्‍याए ।

गएराति भएको खेलमा टोटनहमले प्रस्टोनलाई र ब्रिस्टोल सिटीले वेस्ट ब्रुमलाई समान ३–० गोल अन्तरले पाखा लगाए । लुस्टोन र प्रिम्बी तथा ब्ल्याकर्बुन तथा बर्गिमिनघमले दुई दुई गोलको बराबरी गरे ।