काठमाडौं। अमेरिकाले डाइभरसिटी भिसा (डीभी) लट्री कार्यक्रम स्थगित गर्ने निर्णय गरेको छ। अमेरिकाकी गृह सुरक्षामन्त्री क्रिस्टी नोएमले बिहीबार घोषणा गर्दै उक्त कदम ट्रम्प प्रशासनको निर्देशनमा उठाइएको बताएकी छन्।
नोएमका अनुसार, ब्राउन विश्वविद्यालयका दुई विद्यार्थी र एमआईटीका एक प्राध्यापकको हत्या गर्ने आरोपित क्लाउडियो म्यानुएल नेभ्स भालेन्टे सन् २०१७ मा डाइभरसिटी भिसामार्फत अमेरिका प्रवेश गरेका थिए। उक्त व्यक्तिले अहिले आत्महत्या गरेको प्रहरीले जनाएको छ।
“यो घिनलाग्दो व्यक्तिलाई हाम्रो देशमा प्रवेश गर्न दिनु हुँदैन थियो,” नोएमले एक्स (पूर्व ट्विटर) मार्फत लेखेकी छन्। उनले अमेरिकी नागरिकको सुरक्षा सुनिश्चित गर्न डिभी–१ कार्यक्रम तत्काल स्थगित गर्न यूएससीआईएसलाई निर्देशन दिइएको जानकारी दिइन्।
सन् १९९० मा सुरु भएको डाइभरसिटी भिसा कार्यक्रम अन्तरगत अमेरिका आप्रवासन दर कम भएका देशका नागरिकलाई वार्षिक ५० हजार भिसा प्रदान गर्दै आएको छ। आवेदनकर्ताहरू ‘लट्री’ प्रक्रियाबाट छनोट हुने यस कार्यक्रममा प्रत्येक वर्ष करोडौं व्यक्तिले प्रतिस्पर्धा गर्छन्।
यो कार्यक्रम अमेरिकी संसद्ले बनाएको कानुनअनुसार सञ्चालन हुँदै आएको भए पनि गृह सुरक्षामन्त्रीले स्थगित गर्न सक्ने कानुनी आधार स्पष्ट छैन। डाइभरसिटी भिसा अधिकांशतया अमेरिकी विदेश मन्त्रालयले व्यवस्थापन गर्ने भए पनि केही प्रक्रियाहरू गृह सुरक्षा विभाग अन्तर्गतको यूएस सिटिजनसिप एन्ड इमिग्रेसन सर्भिसेजले सञ्चालन गर्छ।
पूर्व राष्ट्रपति डोनाल्ड ट्रम्प लामो समयदेखि डाइभरसिटी भिसा कार्यक्रमको आलोचक थिए। उनका अनुसार, यो कार्यक्रमले सुरक्षा जोखिम बढाउँछ र रोजगारीमा आधारित पर्याप्त योग्यताको मूल्याङ्कन गर्दैन। ट्रम्पले आफ्नो पहिलो कार्यकालको सुरुवातमै यस कार्यक्रम समाप्त गर्ने प्रयास गरेका थिए।
प्रतिक्रिया