काठमाडौं । बेलायतले वैज्ञानिक, शिक्षाविद् र डिजिटल प्रविधि विज्ञहरू जस्ता उत्कृष्ट प्रतिभालाई लक्षित गरी भिसा शुल्क हटाउने विषयमा विचार गरिरहेको छ। फाइनान्सियल टाइम्सका अनुसार, प्रधानमन्त्री सर कियर स्टार्मरले गठन गरेको ‘विश्वव्यापी प्रतिभा कार्यदल’ले भिसा प्रणालीलाई सुधार गर्ने उपायहरूमा काम गरिरहेको छ।
प्रधानमन्त्रीको कार्यालय टेन डाउनिङ स्ट्रिट र ट्रेजरीका अधिकारीहरूले उच्च दक्ष व्यक्तिहरूलाई बेलायतमा बस्न सजिलो र सस्तो बनाउने योजनामाथि छलफल गरिरहेका छन्। प्रस्तावहरूमा केही व्यक्तिहरूका लागि भिसा शुल्क पूर्ण रूपमा हटाउने विकल्प पनि समावेश गरिएको छ।
कार्यदलको नेतृत्व प्रधानमन्त्रीका व्यापार सल्लाहकार वरुण चन्द्र र विज्ञानमन्त्री लर्ड प्याट्रिक भ्यालेन्सले गरेका छन्। हाल गृह मन्त्रालय औपचारिक रूपमा यस छलफलमा सहभागी नरहे पनि अधिकारीहरूले सबै आप्रवासन मार्गहरूको पुनरावलोकन भइरहेको बताएका छन्।
फाइनान्सियल टाइम्सले उद्धृत गरेको एक अधिकारीका अनुसार, “हामी विश्वका शीर्ष पाँच विश्वविद्यालयका स्नातक वा प्रतिष्ठित अन्तर्राष्ट्रिय पुरस्कार विजेताहरूका लागि भिसा शुल्क शून्य बनाउने विषयमा विचार गर्दैछौं।”
वर्तमानमा बेलायतको ग्लोबल ट्यालेन्ट भिसा कार्यक्रम अन्तर्गत आवेदकलाई ७६६ पाउन्ड स्टर्लिङ शुल्क लाग्ने गर्दछ। साथै, प्रत्येक आवेदकलाई वार्षिक १,०३५ पाउन्डको स्वास्थ्य शुल्क पनि तिर्नुपर्छ। यो भिसा विज्ञान, इन्जिनियरिङ, चिकित्सा, मानविकी, डिजिटल प्रविधि तथा कला क्षेत्रमा योगदान गर्न सक्ने व्यक्तिहरूका लागि हो।
यसैबीच, अमेरिकाले एच–१बी भिसाको शुल्क एक लाख डलरसम्म पुर्याउने घोषणा गरेपछि प्रविधि क्षेत्रमा हलचल उत्पन्न भएको छ। अमेरिकी राष्ट्रपति डोनाल्ड ट्रम्पले घोषणा गरेको यो निर्णयले मध्यम तथा दीर्घकालीन रूपमा श्रम अभाव सिर्जना गर्ने चेतावनी आप्रवासन नीति विश्लेषकहरूले दिएका छन्।
विश्लेषकहरूको भनाइमा, बेलायतको प्रस्तावित नीति अमेरिकाको नीतिसँग ठीक विपरीत छ, र यसले बेलायतलाई वैज्ञानिक तथा प्रविधि क्षेत्रमा ग्लोबल प्रतिभाको आकर्षण केन्द्र बनाउने सम्भावना बलियो बनाएको छ।
प्रतिक्रिया