काठमाडौं – प्रधानमन्त्री केपी शर्मा ओली शनिबार बिहान ७ बजे हिमालयन एयरलाइन्सको चार्टर्ड फ्लाइटमार्फत चीन प्रस्थान गर्दै छन्। उनी तियानजिनमा हुने सांघाई सहयोग संगठन (एससीओ) को शिखर सम्मेलनमा सहभागी हुनेछन्।
परराष्ट्र मन्त्रालयका अनुसार प्रधानमन्त्री ओलीको नेतृत्वमा चीन जाने नेपाली प्रतिनिधिमण्डलमा उनकी पत्नी राधिका शाक्यसहित २३ सदस्य रहने छन्। भ्रमण दलमा पूर्वउपप्रधानमन्त्री पूर्णबहादुर खड्का, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, प्रधानमन्त्रीका आर्थिक सल्लाहकार डा. युवराज खतिवडा, सांसद छविलाल विश्वकर्मा तथा उच्च पदस्थ सरकारी अधिकारीहरू सहभागी छन्।
भ्रमणको क्रममा प्रधानमन्त्री ओलीले चीनका राष्ट्रपति सी चिनफिङसहित रूस, माल्दिभ्स, कम्बोडिया, लाओस र भियतनामका सरकार प्रमुखहरूसँग द्विपक्षीय भेटवार्ता गर्ने कार्यक्रम तय भएको छ। भारतीय प्रधानमन्त्री नरेन्द्र मोदीसँग पनि भेटवार्ताका लागि प्रयास भइरहेको परराष्ट्र मन्त्रालयले जनाएको छ।
प्रधानमन्त्री ओलीले भदौ १६ गते एससीओ प्लस शिखर सम्मेलनलाई सम्बोधन गर्नेछन् भने भदौ १७ गते बेइजिङमा चिनियाँ उपराष्ट्रपति हान झेङसँग भेटवार्ता गर्नेछन्। भदौ १८ गते उनी चीनमा आयोजित दोस्रो विश्वयुद्ध विजय दिवसको ८०औँ वार्षिकोत्सव कार्यक्रममा सहभागी हुनेछन्।
पाँच दिने भ्रमण पूरा गरेर प्रधानमन्त्री ओली भदौ १८ गते बेलुकी १०:३० बजे स्वदेश फर्कने कार्यक्रम छ।
प्रतिक्रिया