काठमाडौंमा होलीको किनमेलमा कमी, बजारमा सुनसान

काठमाडौं। यस वर्षको होली पर्वमा काठमाडौंका मुख्य बजारहरुमा चहलपहल देखिएको छैन। असन, इन्द्रचोक, न्यूरोडलगायतका व्यस्त क्षेत्रहरूमा व्यापारिक गतिविधि मन्द रहेको छ। आर्थिक मन्दी र बेरोजगारीका कारण होलीको व्यापारमा गिरावट आएको व्यापारीहरूको भनाइ छ।

असन बजार, जो काठमाडौं उपत्यकाको एक प्रमुख व्यापारिक केन्द्र हो, यस वर्ष होलीको समयमा सामान्यतया देखिने रंगीन माहोल र चहलपहलबाट टाढा रहेको छ। व्यापारिक दृष्टिले महत्त्वपूर्ण मानिने यो बजारमा व्यापार घटेको छ। एक दशकअघि होलीको समयमा असन बजार रंगीन र चहलपहलले भरिएका हुन्थे, तर यस वर्ष भने स्थिति फरक देखिएको छ।

असुरक्षित अर्थतन्त्र र बेरोजगारीका कारण होलीका लुगा तथा अन्य सामग्रीहरूको बिक्रीमा गिरावट आएको व्यापारीहरूले बताएका छन्। कुष्ण श्रेष्ठ, जो २५ वर्षदेखि असनमा व्यापार गर्दै आएका छन्, भन्छन्, “होलीका सामग्रीहरू महँगो छैनन्, तर व्यापार घटेको छ। बेरोजगारी र आर्थिक मन्दीका कारण होलीका लुगा र रंगहरू पनि बिक्री हुन सकिरहेका छैनन्।”

यस्तै, मुन्ना कुमार जेसवाल, जो पाच वर्षदेखि असन बजारमा व्यापार गर्दै छन्, पनि यस वर्षको व्यापारमा गिरावटको संकेत दिन्छन्। उनका अनुसार, “होलसेलमा आएका होलीका लुगा बिक्न सकिरहेका छैनन्, र यसले व्यापारमा ठूलो असर परेको छ। नेपाली उत्पादनका सामग्री पनि राम्रो विक्री नभएको देखिन्छ।”

व्यापारीहरूको अनुसार, यस वर्ष होलीका लुगा र रंगहरू भारत र चीनबाट आयात गरिएको छ, तर मूल्यमा वृद्धि नभएको हुँदा पनि विक्रीमा वृद्धि हुन सकेको छैन। साथै, भारतबाट भन्सार तिरेर सामान ल्याउनु पर्ने स्थिति व्यापारको लागि थप चुनौती बनिरहेको छ।

रामु कुमार, एक अन्य व्यापारी, भन्छन्, पहिलेको वर्षहरूको तुलनामा यो वर्ष होलीको व्यापार घटेको छ। नेपाली उत्पादनहरू बढी बिक्री भइरहेका छन् भने भारतबाट ल्याएका लुगा कम बिकिरहेका छन्। आर्थिक संकट र बेरोजगारीका कारण बजारमा चहलपहल घटेको छ।

यस वर्षको होली व्यापार यसअघि जस्तो उत्तेजना र चहलपहलसँग लोप भएको देखिन्छ। व्यापारीहरूले विदेशी बजारमा जानका लागि युवाको बढ्दो प्रवृत्तिलाई पनि यसको कारण मान्दै, आगामी दिनहरूमा व्यापारिक सुधारको आशा राखेका छन्।