नेपाल आज गुजरातसँग भिड्दै

काठमाडौं । त्रिकोणात्मक सिरिजअन्तर्गत आज नेपाल र भारतीय क्लब गुजरातबीच प्रतिस्पर्धा हुँदै छ । खेल दिउँसो पौने ३ बजेबाट मेघपन स्पोर्ट्स लाइफ ग्राउन्डमा हुनेछ ।

एसीसी प्रिमियर कप र टी-२० विश्वकपको तयारीस्वरूप नेपालले गुजरात र बरोडासँग टी-२० फ्रेन्डसिप कप खेल्न लागेको हो । नेपालले यही साता आयरल्यान्ड उल्भ्ससँग दुई खेलको टी-२० शृंखला खेलेको थियो ।

सोमबार सम्पन्न पहिलो खेलमा नेपाल ६ विकेटले विजयी भएको थियो । दोस्रो तथा अन्तिम खेलमा पनि ७१ रनको जित हासिल गर्दै नेपालले शृंखला २-० ले क्लिन स्वीप गरेको थियो ।

नेपालले फ्रेन्डसिप कपअन्तर्गत दोस्रो खेल मंगलबार बरोडा क्रिकेट एसोसिएसनसँग खेल्ने छ । त्यसको भोलिपल्ट पुन: गुजरातसँग खेल खेल्ने छ । शुक्रबार बरोडासँग खेल्दै नेपालले फ्रेन्डसिप कपअन्तर्गतका समूह चरणका खेल सकाउने छ ।