सरकारले फेर्‍यो बजेट निर्माणको ‘क्यालेन्डर’, फागुनभित्रै संसदमा पेस गर्नुपर्ने

काठमाडौँ । सरकारले आगामी आर्थिक वर्ष २०८१/८२ को बजेट निर्माण प्रक्रियाको ‘क्यालेन्डर’ फेरेको छ । परम्परागत शैलीमा आउने बजेटको कार्यान्वयन र छलफलमा नीतिगत झन्झट देखा परेपछि आगामी आर्थिक वर्षदेखि बजेट निर्माण प्रक्रियाको ‘क्यालेन्डर’ नै फेरेको हो ।

मन्त्रीपरिषद्को बैठकले ‘आर्थिक कार्यविधि तथा वित्तीय उत्तरदायित्व ऐन, २०७६’ लाई संशोधन गर्दै बजेट क्यालेन्डर परिमार्जन गरेको हो । उक्त ऐन संशोधन गर्न बनेको अध्यादेश पारित गर्दै मन्त्रीपरिषद्को बैठकले राष्ट्रपति समक्ष सिफारिस गर्ने निर्णय गरेको छ । राष्ट्रपतिको कार्यालयबाट यो अध्यादेश जारी भएपछि नीतिगतरुपमा नै बजेटको क्यालेन्डर फेरिनेछ ।

सरकारले चालू आर्थिक वर्षसम्ममा जेठ १५ गते प्रतिनिधि र राष्ट्रिय सभाको संयुक्त संसदमा बजेट पेस गर्दै आइरहेको छ । अध्यादेश जारी भएपछि आगामी आर्थिक वर्षदेखिको बजेट निर्माण प्रक्रिया भने फेरिने भएको हो । अर्थमन्त्री डा. प्रकाशशरण महतले आगामी आर्थिक वर्षको बजेट फागुन भित्रै प्रतिनिधिसभाको संसदमा पेस हुने बताए ।

उनले बजेटको सिद्धान्त र प्राथमिकता फागुन महिनामै आउने जानकारी दिए । मन्त्रीपरिषद्को बैठकले ऐन संशोधन गर्ने निर्णय गरेसँगै कानुनीरुपमा नै बजेट निर्माणमा नयाँ प्रक्रियागत थालनी हुने जानकारी दिए । अर्थमन्त्री डा. महतले चालू आर्थिक वर्षसम्ममा कार्यान्वयनमा रहेको बजेट निर्माणको क्यालेन्डर फेर्दै आगामी आर्थिक वर्षमा नयाँ ढंगको बजेट ल्याउने गरी सरकार अघि बढेको बताएका हुन् ।