गगनले देउवासँग आशीर्वाद लिदा सानेपामा छचल्कियो खुसी

काठमाडौं । नेपाली कांग्रेसका महामन्त्री गगन थापाको जन्मदिनका दिन कांग्रेस पार्टी कार्यालयको माहौल नै फेरियो । जारी केन्द्रीय समिति बैठकमा एकले अर्कोको चर्को आलोचना गरेका नेताहरु गगनको जन्मदिनमा भने हर्षित देखिए ।

सभापति शेरबहादुर देउवाले महामन्त्री थापालाई केक खुवाए, त्यसपछि महामन्त्री विश्वप्रकाश शर्मादेखि अन्य नेताहरुले समेतले थापालाई शुभकामना दिए । मंगलबारदेखि शुरु भएको केन्द्रीय समितिको बैठकले काग्रेसले फेसबुक पेजमार्फत प्रत्यक्ष प्रशारण गरिरहेको छ । त्यो पनि उमेरले ७० नाघेका सभापति शेरबहादुर देउवाको प्रस्तावमा ।

फेसबुकमा लाइभ भइरहेको केन्द्रीय समिति बैठकमा महामन्त्री थापाले सभापति शेरबहादुर देउवाको आलोचना गरिरहेका छन् । त्यसअघि समेत सार्वजनिक रुपमा सभापति देउवालाई संसदीय दलको नेताबाट हटाउन निरन्तर लागिरहेको अभिव्यक्ती दिइरहेका थापालाई बिहिबार भने सभापति देउवाले नै शुभकामना दिए ।

आफ्नै प्रतिस्पर्धी नेताका रुपमा अघि बढ्न खोजेका थापालाई देउवाले दिएको शुभकामना मात्रै होइन, राजनीतिक असहमतिका बिच आफ्ना अग्रज देउवासँग आशिर्वाद लिएको दृष्यले कांग्रेस पार्टी कार्यालयको माहौल नै फेरिदिएको थियो ।

यसलाई कतिपयले कांग्रेसभित्रको आन्तकिर लोकतन्त्रका रुपमा अर्थ लगाएर प्रशंशा समेत गरिरहेका छन् ।