‘जिउँदा शहीद’ मुकेश कायस्थको निधन

काठमाडौं । दोस्रो जनआन्दोलनका ‘जिउँदा शहीद’ मुकेश कायस्थको निधन भएको छ ।

बनेपाको शीर मेमोरियल अस्पतालमा उपचारका लागि भर्ना गरिएका उनको बुधबार साँझ निधन भएको हो ।

२०६२ साल चैत २७ गतेको आन्दोलनका क्रममा कायस्थलाई बनेपामा प्रहरीले चलाएको गोली लागेको थियो । प्रहरीको गोली लागेर अचेत भएका कायस्थलाई पक्षघात भएको थियो । उनी हिँडडुल समेत गर्न सक्दैन थिए ।

गोली लागेपछि होस गुमाएका उनी १७ वर्षसम्म अर्धचेत अवस्थामै बाँचेका थिए । उनको उपचार तथा मासिक खर्च सरकारले ब्यहोर्दै आएको थियो ।