चैत १४ सम्म चल्ने खेलकुद, कृषि तथा पर्यटन महोत्सव हेटौंडामा सुरु

मकवानपुर । खेलकुद क्षेत्रको विकास गर्ने उद्देश्यले हेटौंडा–१० स्थित टिसिएन चौरमा दोस्रो खेलकुद, कृषि तथा पर्यटन महोत्सव सुरु भएको छ । मकवानपुर जिल्ला खेलकुद विकास समितिको आयोजनामा शुक्रबार महोत्सव उद्घाटन गरिएको हो ।

शुक्रबार आयोजित कार्यक्रममा इन्द्र बहादुर बानियाले महोत्सवको उद्घाटन गर्दै खेलकुद विकास समितिले जिल्लाको खेल क्षेत्रको विकास गर्ने उद्देश्यका साथ आयोजना गरेको कार्यक्रम सफल हुने विश्वास व्यक्त गरे। उनले खेलकुदलाई व्यापार–व्यवसायसँग मात्र नजोडी यसको मूल उद्देश्यअनुसार गतिविधि सञ्चालन गर्न आग्रह गरे।

महोत्सव चैत १४ गतेसम्म सञ्चालन हुनेछ । आयोजक समितिका अध्यक्ष राजकुमार मोक्तानका अनुसार महोत्सवअन्तर्गत ६ विधाका खेलकुद प्रतियोगिता आयोजना गरिनेछ । खेल, व्यापार, कृषि र पर्यटनलाई एउटै थलोमा जोड्ने उद्देश्यले महोत्सव आयोजना गरिएको उनले बताए ।
महोत्सवबाट बचत हुने रकम जिल्ला खेलकुद विकास समिति मकवानपुरको भवन निर्माण तथा खेल सामग्री खरिदमा खर्च गरिने आयोजकले जनाएको छ । खेल क्षेत्रमा योगदान पु¥याएका १० जना व्यक्तित्वलाई जनही २५ हजार रुपैयाँसहित सम्मान गर्ने तयारी पनि गरिएको छ ।

कार्यक्रममा जिल्ला समन्वय समिति मकवानपुर प्रमुख ललितबहादुर घलान, मकवानपुरका प्रमुख जिल्ला अधिकारी वसन्त अधिकारी, नेपाल पत्रकार महासंघ मकवानपुर अध्यक्ष बालकृष्ण अधिकारी, मकवानपुर उद्योग वाणिज्य संघका अध्यक्ष प्रमोदसिंह रानाभाटलगायतले शुभकामना मन्तव्य व्यक्त गरेका थिए ।

महोत्सव सञ्चालनमा करिब ८० लाख रुपैयाँ खर्च हुने आयोजकले बताएको छ । ४ सय वटा व्यावसायिक स्टल रहेको महोत्सवमा खेल, व्यापार, कृषि र पर्यटनका सामग्रीहरु राखिएको छ । महोत्सव अवधीभर राष्ट्रिय महिला भलिबल, राष्ट्रिय तेक्वान्दो, जिल्लास्तरीय पुरुष भलिबल, ब्याडमिन्टन र कराँते प्रतियोगिता, १० किलोमटिर महिला तथा पुरुष दौड प्रतियोगिता हुनेछ ।