मुगु । मुगुबासीको मुख्य आम्दानीको स्रोत पशु पालन हो । तर बिगत लामो समयदेखि सोरु गाँउपालिका वडा नम्बर १० र ११ का कृषकहरुले पाल्दै आएका भेडा–बाख्राहरु अज्ञात रोगको चपेटामा परेका छन् । पुस र माघ महिनामा अज्ञात रोगका कारण भेडा वाख्रा धमाधम मर्न थालेपछि स्वास्थ्यकर्मीहरु भेडी गोठहरुका उपचारका साथै रोगको पहिचान गर्न व्यस्त भएका छन् ।
‘हामी तीन पुस्तादेखि भेडा पालन गरेर घर खर्च चलाइरहेका छौं । ६० भेडाको टाउको र घाँटी सुनिने, रौं खुइलिने, छेर्ने, हिड्न गार्हो मान्ने गरेका छन् । घरेलु औषधी गरेपनि नभएपछि एग्रोभेटबाट उपचार भएपनि भेडा मर्ने गरेका छन् । प्रत्येक भेडीगोठबाट २० देखि ३० सम्म भेडा मरेपछि निराश बनाएको छ । हालसम्म कुनैपनि निकायबाट औषधी उपचार भएको छैन् । तर समाचार आएपछि जिल्ला पशु अस्पताल तथा पशु सेवा कार्यालय र प्रदेश प्रयोगशालाबाट औषधीसहितको टोली आएको छ । अब आशा जगाएको छ,’ कृषक पूर्ण बहादुर मल्लले बताए ।
पालिकाको पशु स्वास्थ्य टीम प्रभावित क्षेत्रमा पुगेर औषधी गरिरहेको छ भने गोठमा पुगेर रोगको बारेमा अनुसन्धान भइरहेको र अब रिपोर्ट आएपछि थप औषधी गर्ने सोरु गाँउपालिकाका अध्यक्ष धर्म बहादुर शाहीले बताए । विभिन्न टोलीको अध्ययनले १ सय ५० भन्दा बढी भेडाबाख्रा मरेको पाइएको छ । थप अध्ययन गरी ल्यापबाट रिपोर्ट आएपछि थाहा हुने जिल्ल्ला पशु अस्पताल तथा पशु सेवा कार्यालय मुगुका प्रमुख भीमचन्द्र बुढाले बताए ।
प्रतिक्रिया