जेनजी आन्दोलनपछि बदलिएको मनस्थिति : नयाँ दललाई अवसर दिनुपर्नेमा जोड

काठमाडौं । पछिल्लो समय पूराना भनिएका राजनीतिक दलहरूप्रति विश्वास लाग्न छाडेको युवाहरूले प्रतिक्रिया दिएका छन् ।
जेनजी आन्दोलनपछि अब नयाँ राजनीतिक दललाई अवसर दिनुपर्ने उनीहरुको धारणा छ । नेपाल न्यूज बैंकले केही युवाहरुसँग लिएको प्रतिक्रिया अनुसार देशलाई नयाँ सोच, नयाँ अनुहार र वास्तविक विकासको खाँचो भएकाले पूराना दलबाट सम्भव नभएको उनीहरुको धारणा छ ।

बसन्तपुरमा पसलमा काम गर्दै आएका नारायण हुँमागाईंले राजनीति भद्रगोल जस्तो बनेको बताउँदै पुराना दलको काम जनताले देखिसकेको उल्लेख गरे । उनले जेनजी आन्दोलनपछि नयाँ शक्तिलाई सत्तामा ल्याउनुपर्ने र एकपटक नयाँ दललाई पालो दिनुपर्ने बताए । चुनावको अन्योल र कमजोर शासन प्रणालीले जनताको भरोसा घटाएको उनको भनाइ छ ।

त्यस्तै अर्का जेनजी सुजन तामाङले भने नेतादेखि जनता सबै लथालिंग अवस्था रहेको प्रतिक्रिया दिए । नेताहरुले माइकको अगाडि गर्ने व्यवहार र पछिबाट काम गर्नु धेरै फरक भएको बताए । त्यस्तै उनले देशको विकासको लागी हामी जेनजीले नै सपोर्ट गर्नुपर्ने बताए ।

त्यस्तै जेनजी युवा मनोज चौधरीले पनि वर्षौँदेखि एउटै नेतृत्व दोहोरिँदा विकास हुन नसकेको बताए । नेताहरूको बोली र व्यवहार फरक हुने, कानुन कमजोर भएको र परिवर्तन नआएको उनीहरूको निष्कर्ष छ । आउँदो निर्वाचनमा सक्षम नयाँ पुस्तालाई अवसर दिनुपर्नेमा उनीहरूले जोड दिएका छन् ।