लिबियाली सेनाका प्रमुखसहित ८ जना टर्कीमा विमान दुर्घटनामा मृत्यु

अंकारा, टर्की। लिबियाली सेनाका प्रमुख लेफ्टिनेन्ट जनरल मोहम्मद अल–हद्दादसहित आठ जना टर्कीको हायमाना नजिकै विमान दुर्घटनामा मृत्यु भएका छन्।
टर्कीका गृहमन्त्री अली येरलिकायाका अनुसार फाल्कन–५० विमान मंगलबार राति करिब ८ बजे अंकाराको एसनबोगा विमानस्थलबाट उडेको थियो। टेकअफ भएको करिब ३० मिनेटपछि प्राविधिक समस्या देखिएपछि विमान दुर्घटना भएको हो।
विमानमा लिबियाली सैन्य प्रतिनिधिमण्डल सवार थियो, जो टर्कीसँग रक्षा सहयोगबारे उच्चस्तरीय वार्ता गरेर फर्किँदै थिए। दुर्घटनामा मारिनेमा स्थलसेना प्रमुख जनरल अल–फितुरी घ्रैबिल, ब्रिगेडियर जनरल महमूद अल–कतावी, चिफ अफ स्टाफका सल्लाहकार मोहम्मद अल–असावी दियाब, सैन्य फोटोग्राफर मोहम्मद ओमर अहमद महजुब र तीन जना क्रू सदस्य छन्।
प्रत्यक्षदर्शीहरूले तेज विस्फोटको आवाज र आकाशमा उज्यालो देखिएको बताएका छन्। विमानले आपतकालीन अवतरण संकेत पठाएको थियो, तर त्यसपछि सम्पर्क विच्छेद भयो। दुर्घटनास्थल अंकाराबाट करिब ७० किलोमिटर दक्षिण हायमाना जिल्लामा फेला परेको थियो।
दुर्घटनापछि अंकारा विमानस्थल अस्थायी रूपमा बन्द गरिएको थियो र धेरै उडानहरू अन्य विमानस्थलमा पठाइएका छन्। टर्कीले चार जना अधिकारीलाई अनुसन्धानको लागि नियुक्त गरेको छ भने लिबियाले पनि टोली पठाउने निर्णय गरेको छ।
लिबियाली प्रधानमन्त्री अब्दुल–हामिद दबैबाले विज्ञप्ति जारी गरी अधिकारीहरूको मृत्यु पुष्टि गरेका छन् र यसलाई देशका लागि ठूलो क्षति भनेका छन्।
मोहम्मद अल–हद्दाद सन् २०२० अगस्टदेखि लिबियाली सेनाका प्रमुख थिए। लिबिया राजनीतिक रूपमा विभाजित छ; एकातिर त्रिपोलीमा संयुक्त राष्ट्रसंघ समर्थित सरकार अब्दुलहमीद दबैबाको नेतृत्वमा छ भने पूर्वी लिबियामा खलिफा हफ्तारको प्रशासन छ।