ढाका। बंगलादेशका प्रमुख विरोध आन्दोलनका नेता तथा पूर्व प्रधानमन्त्री शेख हसिनाका कट्टर आलोचक शरिफ उस्मान हादीको टाउकामा गोली लागेपछि मृत्यु भएको छ । उनको मृत्युले बंगलादेशभर नयाँ राजनीतिक अशान्ति र विरोध प्रदर्शन सुरु भएको छ ।
इन्किलाब मञ्चका प्रवक्ता तथा गत वर्षको जुलाई आन्दोलनका अग्रणी नेता हादीको बुधबार सिंगापुरको एक अस्पतालमा उपचारका क्रममा मृत्यु भएको हो । गोली लागेपछि गम्भीर घाइते भएका उनी ६ दिनदेखि जीवन–मृत्युसँग संघर्षरत थिए ।
अन्तरिम सरकारका प्रमुख मोहम्मद युनुसले एक दिनको राष्ट्रिय शोक घोषणा गर्दै हत्यामा संलग्न जो–कोहीलाई पनि कारबाही गरिने बताएका छन् । उनले हादीलाई जुलाई आन्दोलनका “निडर योद्धा”को संज्ञा दिएका छन् ।
गत हप्ता बंगलादेशमै अज्ञात आक्रमणकारीहरूले हादीमाथि गोली प्रहार गरेका थिए । आक्रमणबारे विस्तृत विवरण र संलग्न व्यक्तिबारे प्रहरीले हालसम्म सार्वजनिक गरेको छैन ।
हादी गत वर्ष विद्यार्थी नेतृत्वको आन्दोलनका प्रमुख अनुहार थिए, जसले अगस्ट ५ मा शेख हसिनाको नेतृत्वमा रहेको आवामी लिग सरकार पतन गराएको थियो । उनी आगामी राष्ट्रिय चुनावका उम्मेदवारसमेत रहेको उनका समर्थकहरूले बताएका छन् ।
हादीको मृत्युपछि राजधानी ढाकाको शाहबाग चोकलगायत विभिन्न स्थानमा हजारौं विद्यार्थी र सर्वसाधारण प्रदर्शनमा उत्रिएका छन् । उनीहरूले दोषीको तत्काल पक्राउको माग गरेका छन् ।
बंगलादेश नेशनलिस्ट पार्टी (बीएनपी) र जमात–ए–इस्लामीले हादीको मृत्युप्रति शोक व्यक्त गरेका छन् ।
इन्किलाब मञ्चले आक्रमणकारीहरू पक्राउ नपरे देशव्यापी हड्ताल घोषणा गर्ने चेतावनी दिएको छ । मञ्चले केही आरोपी भारततर्फ भागेको दाबी गर्दै भारतीय अधिकारीहरूसँग समन्वय गरेर फर्काइने जनाएको छ ।
यसैबीच, राजधानी ढाकास्थित चर्चित बंगाली दैनिक प्रोथोम आलो को कार्यालयमा भीडले तोडफोड र आगजनी गरेको छ । घटनाका क्रममा केही पत्रकार र कर्मचारी कार्यालयभित्रै थुनिएका थिए । आक्रमणको कारण हालसम्म स्पष्ट हुन सकेको छैन ।
बढ्दो तनावलाई ध्यानमा राख्दै सरकारले देशभर “अपरेशन डेभिल हन्ट–२” नामक सुरक्षा अभियान सुरु गरेको छ । साथै, चुनावी उम्मेदवार र प्रमुख राजनीतिक व्यक्तिहरूका लागि हतियार लाइसेन्स प्रक्रिया सहज बनाउने घोषणा गरेको छ ।
विश्लेषकहरूले हादीको हत्या आगामी चुनावको सन्दर्भमा बंगलादेशलाई फेरि राजनीतिक अस्थिरताको चरणमा धकेल्न सक्ने चेतावनी दिएका छन् ।
प्रतिक्रिया