ट्रम्प प्रशासनले ‘भिसा वाइभर’ यात्रुबाट पाँच वर्षको सामाजिक सञ्जाल विवरण माग्ने प्रस्ताव

काठमाडौं । अमेरिकी राष्ट्रपति डोनाल्ड ट्रम्प प्रशासनले ‘भिसा वाइभर’ कार्यक्रमअन्तर्गत ४२ देशका नागरिकलाई अमेरिका प्रवेश अघि पाँच वर्षको सामाजिक सञ्जाल इतिहास पेश गर्नुपर्ने प्रस्ताव अघि सारेको छ। प्रस्तावित परिवर्तनअनुसार ईएसटीए (Electronic System for Travel Authorization) फारममा अब सामाजिक सञ्जाल इतिहास, १० वर्षको इमेल विवरण, र परिवारका सदस्यको सम्पर्क तथा बसोबास जानकारी अनिवार्य हुनेछन्।

‘भिसा वाइभर’ कार्यक्रमअन्तर्गत बेलायत, जर्मनी, फ्रान्स, अस्ट्रेलिया, जापान, दक्षिण कोरिया लगायतका राष्ट्रका नागरिकले सामान्यतया भिसा बिना ९० दिनसम्म अमेरिका यात्रा गर्न पाउँछन्। तर प्रवेशभन्दा अघि अनलाइन ईएसटीए स्वीकृति आवश्यक हुन्छ, जसलाई अमेरिकी सीमा सुरक्षा विभाग (सीबीपी) ले सुरक्षासम्बन्धी जोखिम मूल्यांकनका लागि प्रयोग गर्छ।

सीबीपीका अनुसार नयाँ प्रस्तावले राष्ट्र सुरक्षा तथा सार्वजनिक सुरक्षा जोखिम पहिचान गर्ने उद्देश्य राख्छ र ट्रम्प प्रशासनको कडिएको आप्रवासन नीतिलाई सुदृढ गर्नेछ। प्रस्ताव हाल ह्वाइट हाउसको बजेट कार्यालयमा समीक्षा प्रक्रियामा छ।

यद्यपि आलोचकहरूले यस्तो कठोर विवरण सङ्कलनले यात्रुहरूलाई निरुत्साहित गराउने, गोपनीयतामा चुनौती सिर्जना गर्ने तथा पर्यटन उद्योगमा नकारात्मक असर पार्ने चेतावनी दिएका छन्। विशेषगरी सन् २०२६ को फिफा विश्वकपअघि हुने यात्रामा यसको प्रभाव पर्न सक्ने आकलन गरिएको छ।

गत एक वर्षयता ट्रम्प प्रशासनले आप्रवासन प्रणालीमा कडाइ गर्दै आएको छ। भिसा आवेदक, शरणार्थी, हरितपत्र तथा नागरिकता मागकर्ताका सामाजिक सञ्जाल गतिविधि समेत जाँच गर्ने निर्देश अमेरिकी नागरिकता तथा आप्रवासन सेवा (यूएससीआईएस) लाई दिइएको छ, जसले विशेषगरी अमेरिकाविरोधी विचार वा गतिविधि पहिचानमा ध्यान दिने बताएको छ।